٭لغوی معنی:وصیت الايصاء (وصيت كرنے) کے معنی ہیں ہے ۔لغت میں اس کے معنی ہیں [العهد إلى الغير فى القيام بفعل أمر حال حياته أوبعده وفاته](الفقه الإسلامى و أدلته:8/8)’’وصیت سے مراد کسی شخص سے یہ عہد لینا ہے کہ وہ فلاں کام  موصی (وصیت کرنے والے) کی زندگی یا موت کے بعد کرے گا۔‘‘جبکہ اس کا اطلاق کسی دوسرے شخص کے لیے مال مقرر کرنے پر بھی ہوتا ہے ۔٭اصطلاحی تعریف: [تملك مضاف الى ما بعدالموت بطريق التبرع،سواء أكان المملك عينا أو منفعة](حواله مذكور)’’قریب المرگ شخص کا اپنی موت کے بعد کسی چیز کا تبرعا کسی کو مالک بنا دینا وصیت کہلاتا ہے ‘خواہ وہ چیز کوئی مادی شے ہو یا کوئی فائدہ ہو ۔‘‘٭وصیت کی مشروعیت :وصیت کرنا قرآن و سنت سے ثابت ہے فرمان باری تعالیٰ ہے (كُتِبَ عَلَيْكُمْ إِذَا حَضَرَ أَحَدَكُمُ الْمَوْتُ إِنْ تَرَكَ خَيْرًا الْوَصِيَّةُ لِلْوَالِدَيْنِ وَالْأَقْرَبِينَ بِالْمَعْرُوفِ حَقًّا عَلَى الْمُتَّقِينَ) (البقرہ2/180) ’’تم پر فرض  کر دیا گیا ہے کہ جب تم میں سے کوئی مال چھوڑ کر مرنے لگے تو اپنے ماں باپ  اور قرابت داروں کے لیے اچھائی کے ساتھ وصیت کر جائے ‘پرہیز گاروں پر یہ حق ہے ۔‘‘رسول اکرم ﷺ نے اپنے صحابی حضرت سعد﷜ کووصیت کے متعلق ارشاد فرمایا کہ [الثلث والثلث كثيرٌ]’’ایک تہائی کی وصیت کرو اور ایک تہائی بھی بہت ہے ۔‘‘(سنن ابن ماجه ،حديث:2708) نیز آپ نے فرمایا:[ما حقامرى مسلم له شيء يوصي فيه يبيت ليلتين إلا و و صيتة مكتوبة عنده](صحيح البخارى الوصايا،باب الوصايا،حديث:2738 وصحيح مسلم،الوصية ،باب وصية الرجل مكتوبة عنده،حديث:1627)’’کسی مسلمان کے لیے دو راتیں گزارنا بھی جائز نہیں کہ اگر اس کے پاس قابل وصیت مال ہو اور وہ اس میں وصیت کرنا چاہتا ہو ‘مگر یہ کہ اس کی وصیت اس کے پاس لکھی ہوئی رکھی ہو ۔‘‘٭مشروعیت وصیت کی حکمت :اللہ تعالیٰ نے غرباء اور مساکین اقرباء کے لیے مالدار رشتے داروں کے اموال میں حق رکھا ہے تا کہ مالدار شخص کو دنیا میں نیک دعائیں اور نیک مامی حاصل ہو جبکہ آخر ت میں اجر عظیم اس کا مقدر بنے لیکن یہ اس شرط پر ہے کہ وصیت کرنے والا اصل ورثاء کو نقصان نہ پہنچائے ۔٭وصیت کی اقسام بلحاظ حکم:1۔واجب :ایسی وصیت واجب ہے جو حقوق کی ادائیگی  کے سلسلے میں ہو ‘مثلا:قرض کی ادائیگی ‘امانتوں کی سپردگی ‘کفارات کی ادائیگی اور روزوں وغیرہ کا فدیہ ۔2۔ مستحب :غیر ورثاء رشتے داروں کے لیے وصیت کرنا مستحب ہے ۔3۔مباح:غیر وارث امیر رشتے داروں کے حق میں وصیت کرنا مباح ہے ۔4۔مکروہ تحریمی: گناہوں میں ملوث افراد اور اللہ تعالیٰ کے باغیوں کے حق میں وصیت کرنا درست نہیں ہے ۔ واللہ اعلم