التخريج

قسم الحديث (القائل): ، اتصال السند: ، قسم الحديث:

صحيح مسلم: كِتَابُ الْجِهَادِ وَالسِّيَرِ (بَابُ قَوْلِ النَّبِيِّ ﷺ: «لَا نُورَثُ مَا تَرَكْنَا فَهُوَ صَدَقَةٌ»)

حکم : أحاديث صحيح مسلم كلها صحيحة 

1759. حَدَّثَنِي مُحَمَّدُ بْنُ رَافِعٍ أَخْبَرَنَا حُجَيْنٌ حَدَّثَنَا لَيْثٌ عَنْ عُقَيْلٍ عَنْ ابْنِ شِهَابٍ عَنْ عُرْوَةَ بْنِ الزُّبَيْرِ عَنْ عَائِشَةَ أَنَّهَا أَخْبَرَتْهُ أَنَّ فَاطِمَةَ بِنْتَ رَسُولِ اللَّهِ صَلَّى اللَّهُ عَلَيْهِ وَسَلَّمَ أَرْسَلَتْ إِلَى أَبِي بَكْرٍ الصِّدِّيقِ تَسْأَلُهُ مِيرَاثَهَا مِنْ رَسُولِ اللَّهِ صَلَّى اللَّهُ عَلَيْهِ وَسَلَّمَ مِمَّا أَفَاءَ اللَّهُ عَلَيْهِ بِالْمَدِينَةِ وَفَدَكٍ وَمَا بَقِيَ مِنْ خُمْسِ خَيْبَرَ فَقَالَ أَبُو بَكْرٍ إِنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ لَا نُورَثُ مَا تَرَكْنَا صَدَقَةٌ إِنَّمَا يَأْكُلُ آلُ مُحَمَّدٍ صَلَّى اللَّهُ عَلَيْهِ وَسَلَّمَ فِي هَذَا الْمَالِ وَإِنِّي وَاللَّهِ لَا أُغَيِّرُ شَيْئًا مِنْ صَدَقَةِ رَسُولِ اللَّهِ صَلَّى اللَّهُ عَلَيْهِ وَسَلَّمَ عَنْ حَالِهَا الَّتِي كَانَتْ عَلَيْهَا فِي عَهْدِ رَسُولِ اللَّهِ صَلَّى اللَّهُ عَلَيْهِ وَسَلَّمَ وَلَأَعْمَلَنَّ فِيهَا بِمَا عَمِلَ بِهِ رَسُولُ اللَّهِ صَلَّى اللَّهُ عَلَيْهِ وَسَلَّمَ فَأَبَى أَبُو بَكْرٍ أَنْ يَدْفَعَ إِلَى فَاطِمَةَ شَيْئًا فَوَجَدَتْ فَاطِمَةُ عَلَى أَبِي بَكْرٍ فِي ذَلِكَ قَالَ فَهَجَرَتْهُ فَلَمْ تُكَلِّمْهُ حَتَّى تُوُفِّيَتْ وَعَاشَتْ بَعْدَ رَسُولِ اللَّهِ صَلَّى اللَّهُ عَلَيْهِ وَسَلَّمَ سِتَّةَ أَشْهُرٍ فَلَمَّا تُوُفِّيَتْ دَفَنَهَا زَوْجُهَا عَلِيُّ بْنُ أَبِي طَالِبٍ لَيْلًا وَلَمْ يُؤْذِنْ بِهَا أَبَا بَكْرٍ وَصَلَّى عَلَيْهَا عَلِيٌّ وَكَانَ لِعَلِيٍّ مِنْ النَّاسِ وِجْهَةٌ حَيَاةَ فَاطِمَةَ فَلَمَّا تُوُفِّيَتْ اسْتَنْكَرَ عَلِيٌّ وُجُوهَ النَّاسِ فَالْتَمَسَ مُصَالَحَةَ أَبِي بَكْرٍ وَمُبَايَعَتَهُ وَلَمْ يَكُنْ بَايَعَ تِلْكَ الْأَشْهُرَ فَأَرْسَلَ إِلَى أَبِي بَكْرٍ أَنْ ائْتِنَا وَلَا يَأْتِنَا مَعَكَ أَحَدٌ كَرَاهِيَةَ مَحْضَرِ عُمَرَ بْنِ الْخَطَّابِ فَقَالَ عُمَرُ لِأَبِي بَكْرٍ وَاللَّهِ لَا تَدْخُلْ عَلَيْهِمْ وَحْدَكَ فَقَالَ أَبُو بَكْرٍ وَمَا عَسَاهُمْ أَنْ يَفْعَلُوا بِي إِنِّي وَاللَّهِ لَآتِيَنَّهُمْ فَدَخَلَ عَلَيْهِمْ أَبُو بَكْرٍ فَتَشَهَّدَ عَلِيُّ بْنُ أَبِي طَالِبٍ ثُمَّ قَالَ إِنَّا قَدْ عَرَفْنَا يَا أَبَا بَكْرٍ فَضِيلَتَكَ وَمَا أَعْطَاكَ اللَّهُ وَلَمْ نَنْفَسْ عَلَيْكَ خَيْرًا سَاقَهُ اللَّهُ إِلَيْكَ وَلَكِنَّكَ اسْتَبْدَدْتَ عَلَيْنَا بِالْأَمْرِ وَكُنَّا نَحْنُ نَرَى لَنَا حَقًّا لِقَرَابَتِنَا مِنْ رَسُولِ اللَّهِ صَلَّى اللَّهُ عَلَيْهِ وَسَلَّمَ فَلَمْ يَزَلْ يُكَلِّمُ أَبَا بَكْرٍ حَتَّى فَاضَتْ عَيْنَا أَبِي بَكْرٍ فَلَمَّا تَكَلَّمَ أَبُو بَكْرٍ قَالَ وَالَّذِي نَفْسِي بِيَدِهِ لَقَرَابَةُ رَسُولِ اللَّهِ صَلَّى اللَّهُ عَلَيْهِ وَسَلَّمَ أَحَبُّ إِلَيَّ أَنْ أَصِلَ مِنْ قَرَابَتِي وَأَمَّا الَّذِي شَجَرَ بَيْنِي وَبَيْنَكُمْ مِنْ هَذِهِ الْأَمْوَالِ فَإِنِّي لَمْ آلُ فِيهَا عَنْ الْحَقِّ وَلَمْ أَتْرُكْ أَمْرًا رَأَيْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَصْنَعُهُ فِيهَا إِلَّا صَنَعْتُهُ فَقَالَ عَلِيٌّ لِأَبِي بَكْرٍ مَوْعِدُكَ الْعَشِيَّةُ لِلْبَيْعَةِ فَلَمَّا صَلَّى أَبُو بَكْرٍ صَلَاةَ الظُّهْرِ رَقِيَ عَلَى الْمِنْبَرِ فَتَشَهَّدَ وَذَكَرَ شَأْنَ عَلِيٍّ وَتَخَلُّفَهُ عَنْ الْبَيْعَةِ وَعُذْرَهُ بِالَّذِي اعْتَذَرَ إِلَيْهِ ثُمَّ اسْتَغْفَرَ وَتَشَهَّدَ عَلِيُّ بْنُ أَبِي طَالِبٍ فَعَظَّمَ حَقَّ أَبِي بَكْرٍ وَأَنَّهُ لَمْ يَحْمِلْهُ عَلَى الَّذِي صَنَعَ نَفَاسَةً عَلَى أَبِي بَكْرٍ وَلَا إِنْكَارًا لِلَّذِي فَضَّلَهُ اللَّهُ بِهِ وَلَكِنَّا كُنَّا نَرَى لَنَا فِي الْأَمْرِ نَصِيبًا فَاسْتُبِدَّ عَلَيْنَا بِهِ فَوَجَدْنَا فِي أَنْفُسِنَا فَسُرَّ بِذَلِكَ الْمُسْلِمُونَ وَقَالُوا أَصَبْتَ فَكَانَ الْمُسْلِمُونَ إِلَى عَلِيٍّ قَرِيبًا حِينَ رَاجَعَ الْأَمْرَ الْمَعْرُوفَ

مترجم:

1759.

عقیل نے ابن شہاب سے، انہوں نے عروہ بن زبیر سے اور انہوں نے حضرت عائشہ رضی اللہ تعالی عنہا سے روایت کی، انہوں نے اِن (عروہ) کو خبر دی کہ رسول اللہ صلی اللہ علیہ وسلم کی دختر حضرت فاطمہ رضی اللہ تعالی عنہا نے حضرت ابوبکر صدیق رضی اللہ تعالی عنہ کی طرف پیغام بھیجا، وہ رسول اللہ صلی اللہ علیہ وسلم کے اس ورثے میں سے اپنی وراثت کا مطالبہ کر رہی تھیں جو اللہ نے آپﷺ کو مدینہ اور فدک میں بطور فے دیا تھا اور جو خیبر کے خمس سے باقی بچتا تھا، تو حضرت ابوبکر رضی اللہ تعالی عنہ نے کہا: بلاشبہ رسول اللہ صلی اللہ علیہ وسلم نے فرمایا تھا: ’’ہمارا کوئی وارث نہیں ہو گا، ہم جو چھوڑیں گے وہ صدقہ ہو گا اور محمد صلی اللہ علیہ وسلم کا خاندان اس مال میں سے کھاتا رہے گا۔‘‘ اور اللہ کی قسم! میں رسول اللہ صلی اللہ علیہ وسلم کے صدقے کی اس کیفیت میں بھی تبدیلی نہیں کروں گا جس پر وہ رسول اللہ صلی اللہ علیہ وسلم کے عہد میں تھا، اور میں اس میں اسی طریقے پر عمل کروں گا جس پر رسول اللہ صلی اللہ علیہ وسلم نے عمل فرمایا۔ حضرت ابوبکر رضی اللہ تعالی عنہ نے حضرت فاطمہ رضی اللہ تعالی عنہا کو کچھ دینے سے انکار کر دیا تو اس معاملے میں حضرت فاطمہ رضی اللہ تعالی عنہا حضرت ابوبکر رضی اللہ تعالی عنہ پر ناراض ہو گئیں، انہوں نے ان سے قطع تعلق کر لیا اور ان سے بات چیت نہ کی حتی کہ وفات پا گئیں۔ وہ رسول اللہ صلی اللہ علیہ وسلم کے بعد چھ ماہ زندہ رہیں، جب فوت ہوئیں تو ان کے خاوند حضرت علی بن ابی طالب رضی اللہ تعالی عنہ نے انہیں رات کے وقت دفن کر دیا اور حضرت ابوبکر رضی اللہ تعالی عنہ کو اس بات کی اطلاع نہ دی۔ حضرت علی رضی اللہ تعالی عنہ ہی نے ان کی نماز جنازہ پڑھائی۔ حضرت فاطمہ رضی اللہ تعالی عنہا کی زندگی میں حضرت علی ؓ کی طرف لوگوں کی توجہ تھی، جب وہ وفات پا گئیں تو حضرت علی رضی اللہ تعالی عنہ نے لوگوں کے چہرے بدلے ہوئے پائے، اس پر انہوں نے حضرت ابوبکر رضی اللہ تعالی عنہ سے صلح اور بیعت کرنی چاہی۔ انہوں نے ان (چھ) مہینوں کے دوران میں بیعت نہیں کی تھی۔ انہوں نے حضرت ابوبکر رضی اللہ تعالی عنہ کی طرف پیغام بھیجا کہ ہمارے ہاں تشریف لائیں اور آپ کے ساتھ کوئی اور نہ آئے ۔۔ (ایسا) عمر بن خطاب رضی اللہ تعالی عنہ کی آمد کو ناپسند کرتے ہوئے (کہا) ۔۔ اس پر حضرت عمر رضی اللہ تعالی عنہ نے حضرت ابوبکر رضی اللہ تعالی عنہ سے کہا: اللہ کی قسم! آپ ان کے ہاں اکیلے نہیں جائیں گے۔ حضرت ابوبکر رضی اللہ تعالی عنہ نے کہا: ان سے کیا توقع ہے کہ وہ میرے ساتھ (کیا) کریں گے؟ اللہ کی قسم! میں ان کے پاس جاؤں گا۔ چنانچہ حضرت ابوبکر رضی اللہ تعالی عنہ ان کے ہاں آئے تو حضرت علی بن ابی طالب رضی اللہ تعالی عنہ نے (خطبے اور) تشہد کے کلمات کہے، پھر کہا: ابوبکر! ہم آپ کی فضیلت اور اللہ نے جو آپ کو عطا کیا ہے، اس کے معترف ہیں، ہم آپ سے اس خوبی اور بھلائی پر حسد نہیں کرتے جو اللہ نے آپ کو عطا کی ہے، لیکن آپ نے امارت (قبول کر کے) ہم پر من مانی کی ہے اور رسول اللہ صلی اللہ علیہ وسلم سے رشتہ داری کی بنا پر ہم سمجھتے تھے کہ ہمارا بھی کوئی حق ہے (ہم سے بھی مشورہ کیا جاتا)، وہ حضرت ابوبکر رضی اللہ تعالی عنہ سے گفتگو کرتے رہے حتی کہ حضرت ابوبکر رضی اللہ تعالی عنہ کی دونوں آنکھیں بہہ پڑیں۔ پھر جب حضرت ابوبکر رضی اللہ تعالی عنہ نے گفتگو کی تو کہا: اس ذات کی قسم جس کے ہاتھ میں میری جان ہے! مجھے اپنی قرابت کی نسبت رسول اللہ صلی اللہ علیہ وسلم کی قرابت نبھانا کہیں زیادہ محبوب ہے اور اس مال کی بنا پر میرے اور آپ لوگوں کے درمیان جو اختلاف ہوا ہے تو میں اس میں حق سے نہیں ہٹا، اور میں نے کوئی ایسا کام نہیں چھوڑا جو میں نے رسول اللہ صلی اللہ علیہ وسلم کو اس میں کرتے ہوئے دیکھا تھا مگر میں نے بالکل وہی کیا ہے۔ اس پر حضرت علی رضی اللہ تعالی عنہ نے حضرت ابوبکر رضی اللہ تعالی عنہ سے کہا: بیعت کے لیے آپ کے ساتھ (آج) پچھلے وقت کا وعدہ ہے۔ جب حضرت ابوبکر رضی اللہ تعالی عنہ نے ظہر کی نماز پڑھائی تو منبر پر چڑھے، کلماتِ تشہد ادا کیے اور حضرت علی رضی اللہ تعالی عنہ کا حال، بیعت سے ان کے پیچھے رہ جانے کا سبب اور ان کا وہ عذر بیان کیا جو انہوں نے ان کے سامنے پیش کیا تھا، پھر استغفار کیا۔ (اس کے بعد) علی بن ابی طالب رضی اللہ تعالی عنہ نے کلماتِ تشہد ادا کیے اور حضرت ابوبکر رضی اللہ تعالی عنہ کے حق کی عظمت بیان کی اور یہ (کہا: ) کہ انہوں نے جو کیا اس کا سبب ابوبکر رضی اللہ تعالی عنہ کے ساتھ مقابلہ بازی اور اللہ نے انہیں جو فضیلت دی ہے اس کا انکار نہ تھا، لیکن ہم سمجھتے تھے کہ اس معاملے میں ہمارا بھی ایک حصہ تھا جس میں ہم پر من مانی کی گئی ہے، ہمیں اپنے دلوں میں اس پر دکھ محسوس ہوا۔ اس (گفتگو) پر مسلمانوں نے انتہائی خوشی کا اظہار کیا، انہوں نے کہا: آپ نے درست کہا ہے اور جب وہ پسندیدہ بات کی طرف لوٹ آئے تو مسلمان حضرت علی رضی اللہ تعالی عنہ کے قریب ہو گئے۔

×
حدیث ترجمہ:

حضرت عائشہ رضی اللہ تعالی عنہ بیان کرتی ہیں کہ رسول اللہ صلی اللہ علیہ وسلم کی بیٹی حضرت فاطمہ رضی اللہ تعالی عنہ نے ابوبکر صدیق رضی اللہ تعالی عنہ کی طرف پیغام بھیجا، ان سے رسول اللہ صلی اللہ علیہ وسلم کے اس ترکہ میں سے اپنا حصہ مانگا، جو اللہ نے آپ صلی اللہ علیہ وسلم کی طرف مدینہ اور فدک میں لوٹایا تھا اور خیبر کے خمس سے جو بچا تھا تو ابوبکر رضی اللہ تعالی عنہ نے کہا، رسول اللہ صلی اللہ علیہ وسلم نے فرمایا ہے: ’’ہمارا کوئی وارث نہیں ہو گا، ہم نے جو کچھ چھوڑا صدقہ ہو گا‘‘، رسول اللہ صلی اللہ علیہ وسلم کی آل (خاندان) اس مال سے کھاتا رہے گا اور میں اللہ کی قسم! رسول اللہ صلی اللہ علیہ وسلم کے صدقہ میں کسی قسم کی تبدیلی نہیں کروں گا، جس پر وہ رسول اللہ صلی اللہ علیہ وسلم کے عہد میں تھا، میں اس میں وہی لائحہ عمل اختیار کروں گا، جس پر رسول اللہ صلی اللہ علیہ وسلم عمل پیرا تھے تو ابوبکر رضی اللہ تعالی عنہ نے حضرت فاطمہ رضی اللہ تعالی عنہا کو بطور وراثت کچھ دینے سے انکار کر دیا، اس معاملہ پر حضرت فاطمہ رضی اللہ تعالی عنہا، حضرت ابوبکر رضی اللہ تعالی عنہ پر ناراض ہو گئیں اور ان سے ملنا جلنا چھوڑ دیا اور ان سے اپنی وفات تک گفتگو نہیں کی اور وہ رسول اللہ صلی اللہ علیہ وسلم کے بعد چھ ماہ زندہ رہیں، انہیں ان کے خاوند حضرت علی رضی اللہ تعالی عنہ نے ابوبکر رضی اللہ تعالی عنہ  کو آگاہ کیے بغیر رات کو دفن کر دیا اور حضرت علی رضی اللہ تعالی عنہ نے ہی ان کی نماز جنازہ پڑھائی، حضرت فاطمہ رضی اللہ تعالی عنہ کی زندگی میں لوگوں کی حضرت علی رضی اللہ تعالی عنہ کی طرف کچھ توجہ تھی، (وہ انہیں کچھ اہمیت دیتے تھے) تو جب وہ وفات پا گئیں، حضرت علی رضی اللہ تعالی عنہ نے لوگوں کے چہروں میں تبدیلی محسوس کی تو حضرت ابوبکر رضی اللہ تعالی عنہ سے صلح اور بیعت کی خواہش کی اور انہوں نے ان مہینوں میں بیعت نہیں کی تو حضرت ابوبکر رضی اللہ تعالی عنہ کی طرف پیغام بھیجا کہ آپ ہمارے ہاں تشریف لائیں اور ہمارے پاس آپ کے ساتھ کوئی اور نہ آئے، وہ حضرت عمر بن خطاب رضی اللہ تعالی عنہ کی آمد کو پسند نہیں کرتے تھے تو حضرت عمر رضی اللہ تعالی عنہ نے حضرت ابوبکر رضی اللہ تعالی عنہ سے کہا، اللہ کی قسم! آپ ان کے پاس اکیلے نہ جائیں، اس پر ابوبکر رضی اللہ تعالی عنہ نے کہا وہ میرے ساتھ کیا سلوک کر سکتے ہیں، یعنی کسی ناگوار سلوک کا خطرہ نہیں ہے، میں اللہ کی قسم! ان کے پاس ضرور جاؤں گا تو ابوبکر رضی اللہ تعالی عنہ ان کے ہاں پہنچے تو حضرت علی رضی اللہ تعالی عنہ نے کلمہ شہادت (خطبہ) پڑھا اور پھر کہا کہ ہم اے ابوبکر رضی اللہ تعالی عنہ آپ کی فضیلت کے معترف ہیں اور اللہ تعالیٰ نے آپ کو جو (خلافت) دی ہے، ہم اس کو بھی پہچانتے ہیں اور جو اچھائی اور خیر اللہ تعالیٰ نے آپ کو عنایت کی ہے، ہم اس پر آپ سے حسد نہیں کرتے، لیکن بات یہ ہے کہ آپ نے ہمارے مشورہ کے بغیر خود ہی اس خلافت کا فیصلہ کر لیا اور ہم رسول اللہ صلی اللہ علیہ وسلم سے رشتہ داری کی بنا پر (مشورہ میں) اپنا حق سمجھتے تھے، اس طرح وہ حضرت ابوبکر رضی اللہ تعالی عنہ سے گفتگو کرتے رہے حتی کہ ابوبکر رضی اللہ تعالی عنہ کی آنکھوں میں آنسو بہنے لگے تو جب ابوبکر رضی اللہ تعالی عنہ نے گفتگو شروع کی کہا، اس ذات کی قسم، جس کے ہاتھ میں میری جان ہے، رسول اللہ صلی اللہ علیہ وسلم کی رشتہ داری کا پاس، لحاظ، مجھے اپنی رشتہ داری سے، صلہ رحمی کرنے سے زیادہ عزیز ہے، رہا وہ اختلاف جو میرے اور آپ کے درمیان ان اموال کی بنا پر پیدا ہو گیا ہے تو میں نے حق کو ملحوظ رکھنے میں کوئی کوتاہی نہیں کی اور میں نے کوئی ایسا کام نہیں چھوڑا، جو رسول اللہ صلی اللہ علیہ وسلم کو میں نے کرتے دیکھا ہے، میں نے ایسے ہی کیا ہے تو حضرت علی رضی اللہ تعالی عنہ نے ابوبکر سے کہا، آج سہ پہر ہم آپ سے بیعت کریں گے، تو جب حضرت ابوبکر رضی اللہ تعالی عنہ نے ظہر کی نماز پڑھا دی، وہ منبر پر چڑھ گئے، تشہد یعنی کلمہ شہادت پڑھا، حضرت علی رضی اللہ تعالی عنہ کا مقام و مرتبہ بیان کیا اور بیعت سے پیچھے رہنے کی بات کی اور ان کا وہ عذر بیان کیا جو انہوں نے پیش کیا تھا، پھر استغفار کیا، (اور منبر سے اتر آئے۔) حضرت علی رضی اللہ تعالی عنہ نے کلمہ شہادت پڑھا اور ابوبکر سے حق کی عظمت کو بیان کیا اور بتایا کہ میں نے جو کچھ کیا ہے، اس پر مجھے ابوبکر رضی اللہ تعالی عنہ سے حسد نے آمادہ نہیں کیا اور نہ اس فضیلت سے انکار نے جو اللہ نے اسے بخشی ہے، لیکن بات یہ ہے کہ ہم اس معاملہ (خلافت) میں اپنا حصہ سمجھتے تھے اور ہمیں اس میں مشورہ دینے سے محروم رکھا گیا، اس وجہ سے ہم نے ناراضی محسوس کی، اس سے مسلمان خوش ہو گئے اور کہنے لگے، آپ نے درست کہا اور جب وہ معروف بات کی طرف لوٹ آئے تو مسلمان حضرت علی کے زیادہ قریب ہو گئے۔

حدیث حاشیہ:

مفردات الحدیث

ارسلت الي ابي بكر: حضرت ابوبکر رضی اللہ عنہ کو پیغام بھیجا اور پھر حضرت فاطمہ رضی اللہ عنہا اور حضرت عباس رضی اللہ عنہ دونوں خود ابوبکر رضی اللہ عنہ کے پاس آئے، اور اپنا رسول اللہ صلی اللہ علیہ وسلم کے متروکہ اموال میں سے جو مندرجہ ذیل ہیں میں حصہ طلب کیا۔
(1) اموال مدینہ: بنو نضیر کے باغات، جو آپ صلی اللہ علیہ وسلم کو فئی میں حاصل ہوئے تھے، آپ نے ان کا اکثر حصہ مہاجروں میں تقسیم کر دیا، اور انصار نے جو مال مہاجروں کو دئیے تھے، وہ ان کو واپس کر دئیے گئے اور بنو نضیر کے باغات سے دو ضرورت مند انصاریوں کو بھی حصہ دیا گیا اور باقی حصہ فئی کے مال کی حیثیت سے آپ صلی اللہ علیہ وسلم کے پاس رہا۔
(2) فدك: یہ مدینہ سے تین مراحل اور خیبر سے دو دن کے فاصلہ پر ایک علاقہ تھا، وہاں یہودی آباد تھے، جب خیبر فتح ہو گیا تو انہوں نے رسول اللہ صلی اللہ علیہ وسلم کو یہ پیش کش کی کہ انہیں کچھ نہ کہا جائے اور وہ یہ علاقہ خالی کرنے کے لیے تیار ہیں تو آپ نے اہل خیبر کے معاملہ کے مطابق، فدک کی نصف پیداوار دینے پر، ان کی مصالحت کی پیش کش قبول کر لی، اس طرح چونکہ مسلمانوں نے اس پر گھوڑے اور اونٹ نہیں دوڑائے تھے، اس لیے یہ مال فئی ٹھہرا اور رسول اللہ صلی اللہ علیہ وسلم کے تصرف و اختیار میں آ گیا۔
(3) خمس خیبر: رسول اللہ صلی اللہ علیہ وسلم نے خیبر کی زمین اس شرط پر یہود کے پاس رہنے دی کہ ساری کھیتی اور تمام پھلوں کی پیداوار کا آدھا حصہ یہود کو دیا جائے گا اور رسول اللہ صلی اللہ علیہ وسلم کی جب تک مرضی ہو گی، آپ یہود کو اس شرط پر یہاں رہنے دیں گے، پھر خیبر کی تقسیم اس طرح کی گئی کہ اسے چھتیس (36) حصوں میں تقسیم کیا گیا، ہر حصہ ایک سو حصہ پر مشتمل تھا، اس طرح کل حصے، چھتیس سو (3600) ہوئے، ان میں سے نصف یعنی اٹھارہ سو (1800) حصے رسول اللہ صلی اللہ علیہ وسلم نے مسلمانوں کی اجتماعی ضروریات اور حوادث کے لیے الگ کر لیے اور اٹھارہ سو حصے مسلمانوں میں اس لیے تقسیم کیے گئے کہ وہ اہل حدیبیہ کے لیے اللہ تعالیٰ کی طرف سے ایک تحفہ اور انعام تھا، اہل حدیبیہ کی تعداد چودہ سو (1400) تھی، جو خیبر آئے وہ اپنے ساتھ دو سو (200) گھوڑے لائے تھے اور گھوڑ سوار کو تین حصے ملتے ہیں، اس طرح دو سو (200) سواروں کو چھ سو حصے آئے اور باقی بارہ سو پیدل حضرات کو 12 سو حصے آئے، تفصیل کے لیے سيرة ابن هشام مع الروض الانف للسهيلي، ج 2 ص 246 اور الرحیق المختوم، غزوہ خیبر دیکھیں۔
(4) انما ياكل آل محمد في هذا المال: آل محمد صلی اللہ علیہ وسلم اس مال سے کھائے گا، اس بات کی دلیل ہے کہ حضرت ابوبکر رضی اللہ عنہ نے آپ کی قرابت کو ان منافع سے محروم نہیں کیا جو انہیں رسول اللہ صلی اللہ علیہ وسلم کے دور میں حاصل تھے، صرف بطور وراثت مال دینے سے رسول اللہ صلی اللہ علیہ وسلم کے فرمان کے مطابق انکار کیا اور اگر ان اموال کا نظم و نسق حضرت عباس رضی اللہ عنہ اور حضرت فاطمہ رضی اللہ عنہا کے حوالے کر دیا جاتا، جس کے وہ خواہشمند تھے تو اس میں وراثت والی صورت حال پیدا ہو جاتی، جیسا کہ حضرت عمر رضی اللہ عنہ نے کچھ اموال حضرت عباس رضی اللہ عنہ اور حضرت علی رضی اللہ عنہ کی تولیت میں دئیے تھے تو ان میں اختلاف پیدا ہو گیا اور معاملہ دور تک جا پہنچا۔عمر بن شبہ تاریخ مدینہ میں لکھتے ہیں،
فلم تكلمه في ذالك المال حتي ماتت: وہ اس کے بارے میں ابوبکر رضی اللہ عنہ سے وفات تک گفتگو نہیں کی، سنن ابی داؤد کی حدیث نمبر 2973 ہے، حضرت فاطمہ رضی اللہ عنہا نے حضرت ابوبکر رضی اللہ عنہ سے کہا، فانت وما سمعت: تو اپنے سنے ہوئے پر عمل کرنے میں آزاد ہے، اس لیے ابن کثیر لکھتے ہیں، انها سلمت له ماقال: فاطمہ رضی اللہ عنہا نے حضرت ابوبکر رضی اللہ عنہ کا قول تسلیم کر لیا، (البدایة والنھایة، ج 5، ص 289) (الریاض النضرۃ ج 1 ص 156۔) ان فاطمة لم تمت الاراضية عن ابي بكر، (عمدۃ القاری ج 10، ص 20)
(5) فغضبت فاطمه ووجدت، فهجرته: یہ امام زھری کا اپنا تصور یا خیال ہے جو کئی روایات کے منافی ہے، تفصیل کے لیے دیکھئے، تکملہ ج 3، ص 92 تا 96۔ باقر مجلسی جلاء العین ص 172 پر لکھتے ہیں، بوصيت العمل نموده خود متوجه تيمارداري بود اسماء بنت عميس آن حضرت راوريں امور معونت مي كرد، حضرت علی رضی اللہ عنہ نے حضرت فاطمہ رضی اللہ عنہا کی تلقین و تاکید پر عمل کرتے ہوئے بذات خود ان کی تیمارداری پر توجہ دی اور اس سلسلہ میں اسماء بنت عمیس رضی اللہ عنہا نے ان سے تعاون کیا، مصنف عبدالرزاق ج: 3، ص 410، پر حضرت اسماء رضی اللہ عنہا کا بیان ہے کہ حضرت فاطمہ رضی اللہ عنہا کو غسل میں نے اور حضرت علی رضی اللہ عنہ نے دیا۔
(6) ولم يؤذن بها ابابكر: یہ بھی زہری کا خیال ہے اور اس کے خلاف روایات موجود ہیں، کیونکہ حضرت ابوبکر رضی اللہ عنہ کی بیوی، حضرت اسماء بنت عمیس رضی اللہ عنہا، حضرت فاطمہ رضی اللہ عنہا کی تیمارداری کرتی رہی ہیں اور حضرت علی رضی اللہ عنہ کے ساتھ، وہ حضرت فاطمہ رضی اللہ عنہا کو غسل دینے میں شریک تھیں۔ تفصیل کے لیے دیکھئے تکملہ ج3، ص 101، 102۔
(7) اصلي عليها علي: یہ بھی زہری کا خیال ہے اور کئی مرسل روایات اس کے خلاف موجود ہیں، جن سے ثابت ہوتا ہے کہ نماز جنازہ ابوبکر رضی اللہ عنہ نے پڑھائی۔ تکملہ، ج3، ص 103۔ ابو نعیم رحمہ اللہ حلیۃ الاولیاء ج 4 ص 96 پر لکھتے ہیں، ابن عباس رضی اللہ عنہما کہتے ہیں كبر ابوبكر علي فاطمه اربعا ابوبکر رضی اللہ عنہ نے حضرت فاطمہ رضی اللہ عنہا کے جنازہ میں چار تکبیریں کہیں۔
(8) ولم يكن بايع تلك الاشهر: انہوں نے چھ ماہ بیعت نہیں کی، یہ بھی زہری کا کلام ہے، تکملہ ج: 3، ص 106۔ حضرت علی رضی اللہ عنہ نے دو تین دن کے اندر بیعت کر لی تھی۔ تکملہ، ج 3 ص 107 تا 109۔ تفصیل کے لیے دیکھئے صدیق اکبر بحث حضرت علی کی بیعت ص 89 تا 103 چھ ماہ کے بعد تجدید بیعت کی تھی کہ حضرت فاطمہ رضی اللہ عنہا کی زندگی میں وہ مشغولیت کی بنا پر اجتماعی امور میں حصہ نہیں لے سکتے تھے۔ حافظ ابن کثیر لکھتے ہیں، اس واقعہ کا ایک اہم اور قابل ذکر پہلو یہ ہے کہ حضرت علی رضی اللہ عنہ نے پہلے ہی دن بیعت کی ہے یا وفات کے دوسرے دن اور یہی حقیقت امر ہے، کیونکہ حضرت علی رضی اللہ عنہ نے کسی وقت حضرت ابوبکر رضی اللہ عنہ کا ساتھ نہیں چھوڑا اور کسی نماز میں بھی غیر حاضر نہیں رہے، البدایہ والنہایہ ج5، ص 249۔ مولانا علی میاں لکھتے ہیں، ابن کثیر اور دوسرے اہل علم کا رجحان اس طرف ہے کہ دوسری بیعت پہلی بیعت کی توثیق و تجدید تھی، اس سلسلہ میں صحیحین اور ان کے علاوہ دوسری کتابوں میں متعدد روایتیں ہیں، دیکھئے البدایہ والنہایہ ج 5 ص 346۔
(9) لم ننفس عليك: ہمیں آپ سے حسد و کینہ نہیں ہے۔
(10) كان المسلمون الي علي قريبا: مسلمان حضرت علی رضی اللہ عنہ کے اس طرز عمل سے بہت خوش ہوئے اور ان کے پہلے سے زیادہ قریب ہو گئے۔

فوائد ومسائل

حضرت علی رضی اللہ عنہ نے صرف ابوبکر رضی اللہ عنہ کو آنے کی دعوت دی اور کہا، آپ کے ساتھ کوئی اور نہ کہے، کیونکہ خلیفہ ابوبکر تھے اور وہ ان سے علیحدگی میں اپنا شکوہ و شکایات بیان کرنا چاہتے اور حضرت ابوبکر چونکہ نہایت نرم دل، بردبار متحمل اور رقیق القلب تھے، اس لیے حضرت علی رضی اللہ عنہ سمجھتے تھے، وہ تمام شکوہ شکایت تحمل اور متانت سے سن لیں گے، اگر ان کے ساتھ کوئی اور آ گیا، خاص کر عمر رضی اللہ عنہ آ گئے تو چونکہ وہ ذرا سخت مزاج کے تھے اور اصول پسند تھے، شاید وہ ہمارا شکوہ و شکایت پوری طرح نہیں سن سکیں یا اس پر کسی رد عمل کا اظہار کریں، اس طرح باہمی اعتماد کی فضا قائم نہ رہ سکے اور حضرت عمر رضی اللہ عنہ نے حضرت ابوبکر رضی اللہ عنہ کو اکیلے جانے سے اس لیے روکا کہ شاید وہ اپنی نرم مزاجی کی وجہ سے بات کرنے میں زیادہ لچک اور نرمی اختیار کریں یا ان کو اگر کوئی سخت بات کہی جائے تو وہ اس کا جواب نہ دیں، اس طرح خلیفہ کا وقار مجروم ہو، لیکن حضرت ابوبکر رضی اللہ عنہ سمجھتے تھے، اب اتنا عرصہ ہو گیا ہے، وہ آغاز کا رنج اور غصہ زائل ہو چکا ہے، اس لیے ان سے کسی قسم کے غلط سلوک کا خطرہ نہیں ہے اور ان کی رائے کے عین مطابق اعتماد کی فضا میں بات چیت ہوئی، شکوہ و شکایت نہیں سنائے گئے اور افہام و تفہیم سے مسئلہ حل ہو گیا اور انہوں نے تجدید بیعت کر کے، بعد میں اپنا بھرپور کردار ادا کیا اور بعد و دوری کی فضا بالکل ختم ہو گئی۔
×
ترقیم کوڈاسم الترقيمنام ترقیمرقم الحديث (حدیث نمبر)
١.ترقيم موقع محدّث ویب سائٹ محدّث ترقیم4681
٢. ترقيم فؤاد عبد الباقي (المكتبة الشاملة)ترقیم فواد عبد الباقی (مکتبہ شاملہ)1759
٣. ترقيم العالمية (برنامج الكتب التسعة)انٹرنیشنل ترقیم (کتب تسعہ پروگرام)3304
٤. ترقيم فؤاد عبد الباقي (برنامج الكتب التسعة)ترقیم فواد عبد الباقی (کتب تسعہ پروگرام)1759
٦. ترقيم شركة حرف (جامع خادم الحرمين للسنة النبوية)ترقیم حرف کمپنی (خادم الحرمین الشریفین حدیث ویب سائٹ)4611
٧. ترقيم دار إحیاء الکتب العربیة (جامع خادم الحرمين للسنة النبوية)ترقیم دار احیاء الکتب العربیہ (خادم الحرمین الشریفین حدیث ویب سائٹ)1759
٨. ترقيم دار السلامترقیم دار السلام4580

الحكم على الحديث

×
اسم العالمالحكم
١. إجماع علماء المسلمينأحاديث صحيح مسلم كلها صحيحة

تمہید باب

×

تمہید کتاب

×

تمہید باب عربی

×

تمہید کتاب عربی

×