جامع ترمذی: كتاب: طلاق ور لعان کے احکام ومسائل (باب: بیوی سے تیرامعاملہ تیرے ہاتھ میں ہے کہنے کا بیان​)

ترجمۃ الباب:

1178.

حماد بن زیدکا بیان ہے کہ میں نے ایوب (سختیانی) سے پوچھا: کیا آپ حسن بصری کے علاوہ کسی ایسے شخص کو جانتے ہیں، جس نے (أمرك بيدك) کے سلسلہ میں کہا ہو کہ یہ تین طلاق ہے؟ انہوں نے کہا: حسن بصری کے۔ علاوہ مجھے کسی اورکاعلم نہیں، پھر انہوں نے کہا: اللہ !معاف فرمائے۔ ہاں وہ روایت ہے جو مجھ سے قتادہ نے بسند کثیرمولیٰ بنی سمرہ عن ابی سلمہ عن ابی ہریرہ روایت کی ہے کہ نبی اکرمﷺ آپ نے فرمایا: ’’یہ تین طلاقیں ہیں‘‘۔ ایوب کہتے ہیں: پھرمیں کثیرمولیٰ بنی سمرہ سے ملا تو میں نے ان سے اس حدیث کے بارے میں پوچھا مگروہ اسے نہیں جان سکے۔ پھر میں قتادہ کے پاس آیا اور انہیں یہ بات بتائی تو انہوں نے کہا: وہ بھول گئے ہیں۔
امام ترمذی کہتے ہیں:
۱۔ یہ حدیث غریب ہے۔
۲۔ ہم اسے صرف سلیمان بن حرب ہی کی روایت سے جانتے ہیں انہوں نے اسے حماد بن زید سے روایت کیا ہے۔
۳۔ میں نے اس حدیث کے بارے میں محمد بن اسماعیل بخاری سے پوچھا توانہوں نے کہا: ہم سے سلیمان بن حرب نے بیان کیا انہوں نے اسے حماد بن زید سے روایت کیا ہے اور یہ ابوہریرہ سے موقوفاً مروی ہے، اوروہ ابوہریرہ کی حدیث کومرفوع نہیں جان سکے۔
۴۔ اہل علم کا (أمرك بيدك) کے سلسلے میں اختلاف ہے، بعض صحابہ کرام وغیرہم جن میں عمربن خطاب، عبداللہ بن مسعود ؓ بھی ہیں کہتے ہیں کہ یہ ایک (طلاق) ہوگی۔ اوریہی تابعین اوران کے بعد کے لوگوں میں سے کئی اہل علم کا بھی قول ہے۔
۵۔ عثمان بن عفان اور زید بن ثابت کہتے ہیں کہ فیصلہ وہ ہوگا جو عورت کہے گی۔
۶۔ ابن عمر ؓ کہتے ہیں: جب شوہرکہے کہ ’’اس کا معاملہ اس (عورت) کے ہاتھ میں ہے‘‘، اور عورت خود سے تین طلاق قراردے لے۔ اورشوہرانکارکرے اور کہے: میں نے صرف ایک طلاق کے سلسلہ میں کہا تھا کہ اس کا معاملہ اس کے ہاتھ میں ہے تو شوہر سے قسم لی جائے گی اور شوہر کا قول اس کی قسم کے ساتھ معتبر ہوگا۔
۷۔ سفیان اور اہل کوفہ عمر اور عبداللہ بن مسعود ؓ کے قول کی طرف گئے ہیں۔
۸۔ اور مالک بن انس کا کہنا ہے کہ فیصلہ وہ ہوگا جوعورت کہے گی، یہی احمد کا بھی قول ہے۔
۹۔ اوررہے اسحاق بن راہویہ تو وہ ابن عمر ؓ کے قول کی طرف گئے ہیں۔