جامع ترمذی: كتاب: شکار کے احکام ومسائل (باب: کتے کا کون ساشکارکھایاجائے اورکون سا نہ کھایاجائے؟​)

ترجمۃ الباب:

1464.

ابوثعلبہ خشنی ؓ کہتے ہیں کہ میں نے عرض کیا: اللہ کے رسولﷺ! ہم لو گ شکاری ہیں؟ (شکارکے احکام بتائیے ؟) آپﷺ نے فرمایا: ’’جب تم (شکارکے لیے) اپنا کتا چھوڑو اوراس پر اللہ کا نام یعنی بسم اللہ پڑھ لوپھروہ تمہارے لیے شکارکو روک رکھے تو اسے کھاؤ؟‘‘ میں نے کہا: اگرچہ وہ شکارکو مارڈالے، آپﷺ نے فرمایا: ’’اگرچہ مارڈالے‘‘، میں نے عرض کیا: ہم لوگ تیراندازہیں (تواس کے بارے میں فرمائیے؟) آپﷺ نے فرمایا: ’’تمہارا تیر جوشکار کرے اسے کھاؤ‘‘، میں نے عرض کیا: ہم سفرکرنے والے لوگ ہیں، یہودونصاریٰ اورمجوس کی بستیوں سے گزرتے ہیں اور ان کے برتنوں کے علاوہ ہمارے پاس کوئی برتن نہیں ہوتا (توکیا ہم ان کے برتنوں میں کھالیں؟) آپﷺ نے فرمایا: ’’اگر تم اس کے علاوے کوئی برتن نہ پا سکو تو اسے پانی سے دھولوپھر اس میں کھاؤ پئو‘‘۱؎۔ اس باب میں عدی بن حاتم سے بھی روایت ہے۔
امام ترمذی کہتے ہیں:
۱۔ یہ حدیث حسن صحیح ہے۔
۲۔ ابوثعلبہ خشنی کا نام جرثوم ہے، انہیں جرثم بن ناشب اورجرثم بن قیس بھی کہاجاتاہے۔