جامع ترمذی: كتاب: شکار کے احکام ومسائل (باب: حلق اورلبہ (سینے کے اوپری حصہ) میں ذبح کرنے کا بیان​)

ترجمۃ الباب:

1481.

ابوالعشراء کے والد اسامہ بن مالک سے روایت ہے کہ میں نے پوچھا: اللہ کے رسولﷺ! کیا ذبح(شرعی) صرف حلق اورلبہ ہی میں ہوگا؟ آپﷺ نے فرمایا: ’’اگر اس کی ران میں بھی تیرماردو توکافی ہوگا‘‘، یزید بن ہارون کہتے ہیں: یہ حکم ضرورت کے ساتھ خاص ہے۔
امام ترمذی کہتے ہیں:
۱۔ یہ حدیث غریب ہے، ہم اسے صرف حماد بن سلمہ ہی کی روایت سے جانتے ہیں۔
۲۔ اس حدیث کے علاوہ ابوالعشر اء کی کوئی اورحدیث ان کے باپ سے ہم نہیں جانتے ہیں، ابوالعشراء کے نام کے سلسلے میں اختلاف ہے: بعض لوگ کہتے ہیں: ان کا نام اسامہ بن قھطم ہے، اور کہاجاتاہے ان کا نام یساربن برز ہے اورا بن بلز بھی کہا جاتا ہے، یہ بھی کہا جاتا ہے کہ ان کا نام عطارد ہے دادا کی طرف ان کی نسبت کی گئی ہے۔
۳۔ اس باب میں رافع بن خدیج سے بھی روایت آئی ہے۔