جامع ترمذی: كتاب: قرآن کریم کی تفسیر کے بیان میں (باب: سورہ احزاب سے بعض آیات کی تفسیر​)

ترجمۃ الباب:

3203.

طلحہ ؓ سے روایت ہے کہ صحابہ نے ایک جاہل دیہاتی سے کہا کہ وہ نبی اکرمﷺ سے ﴿مِمَّنْ قَضَى نَحْبَهُ﴾ سے متعلق پوچھے کہ اس سے مراد کیا ہے؟ وہ لوگ خود آپﷺ سے یہ سوال پوچھنے کی ہمت نہیں کر رہے تھے، وہ آپﷺ کا ادب واحترام کرتے تھے اور آپﷺ سے ڈرتے بھی تھے، اعرابی نے آپﷺ سے پوچھا، مگر آپﷺ نے اعراض کیا، اس نے پھر پوچھا، آپﷺ نے پھر اس کی طرف توجہ نہ دی، اس نے پھر پوچھا: آپﷺ نے پھر بے رخی برتی، پھر میں مسجد کے دروازے سے نمودار ہوا اور (اندر آیا) میں (نمایاں) سبز کپڑے پہنے ہوئے تھا، جب آپﷺ نے مجھے دیکھا تو آپﷺ نے فرمایا: ﴿مِمَّنْ قَضَى نَحْبَهُ﴾ سے متعلق پوچھنے والا شخص کہاں ہے؟ اعرابی ، (گنوار دیہاتی) نے کہا: اللہ کے رسولﷺ! میں حاضر ہوں، رسول اللہ ﷺ نے فرمایا: ’’یہ شخص (طلحہ) انہی لوگوں میں سے ہے، جنہوں نے اپنے کام اور ذمہ داریاں پوری کر دی ہیں‘‘۔
امام ترمذی کہتے ہیں: یہ حدیث حسن غریب ہے، ہم اسے صرف یونس بن بکیر کی روایت ہی سے جانتے ہیں۔