جامع ترمذی: كتاب: قرآن کریم کی تفسیر کے بیان میں (باب: سورہ فتح سے بعض آیات کی تفسیر​)

ترجمۃ الباب:

3263.

انس ؓ کہتے ہیں: نبی اکرمﷺ پر حدیبیہ سے واپسی کے وقت ﴿لِيَغْفِرَ لَكَ اللَّهُ مَا تَقَدَّمَ مِن ذَنبِكَ وَمَا تَأَخَّرَ﴾ (الفتح :2)۱؎ نازل ہوئی، تونبی اکرمﷺ نے فرمایا: ’’مجھ پر ایک ایسی آیت نازل ہوئی ہے جو مجھے زمین کی ساری چیزوں سے زیادہ محبوب ہے، پھر آپﷺ نے وہ آیت سب کو پڑھ کر سنائی‘‘، لوگوں نے (سن کر) هنيأ مريئًا کہا، (آپﷺ کے لیے خوش گوار اور مبارک ہو، اے اللہ کے نبیﷺ! اللہ نے آپﷺ کو بتا دیا کہ آپﷺ کے ساتھ کیا کیا جائے گا مگر ہمارے ساتھ کیا کیا جائے گا؟ اس پر آیت ﴿لِيُدْخِلَ الْمُؤْمِنِينَ وَالْمُؤْمِنَاتِ جَنَّاتٍ تَجْرِي مِن تَحْتِهَا الأَنْهَارُ﴾ سے لے کر سے ﴿فَوْزًا عَظِيمًا﴾ (الفتح:5) تک نازل ہوئی۔
امام ترمذی کہتے ہیں:
۱۔ یہ حدیث حسن صحیح ہے۔
۲۔ اس باب میں مجمع بن جاریہ سے بھی روایت ہے۔