جامع ترمذی: كتاب: قرآن کریم کی تفسیر کے بیان میں (باب: سورہ مدثر سے بعض آیات کی تفسیر​)

ترجمۃ الباب:

3327.

جابر بن عبداللہ ؓ کہتے ہیں: کچھ یہودیوں نے بعض صحابہ سے پوچھا: کیا تمہارا نبی جانتا ہے کہ جہنم کے نگراں کتنے ہیں؟ انہوں نے کہا: ہم نہیں جانتے مگر پوچھ کر جان لیں گے، اسی دوران ایک شخص نبی اکرم ﷺکے پاس آیا، کہا: اے محمدﷺ! آج تو تمہارے ساتھی ہار گئے، آپﷺ نے پوچھا ’’کیسے ہار گئے؟‘‘ اس نے کہا: یہود نے ان سے پوچھا کہ کیا تمہارا نبی جانتا ہے کہ جہنم کے نگراں کتنے ہیں؟ آپﷺ نے پوچھا انہوں نے کیا جواب دیا ؟ اس نے کہا: انہوں نے کہا: ہمیں نہیں معلوم، ہم اپنے نبی سے پوچھ کر بتا سکتے ہیں، آپﷺ نے فرمایا: ’’کیا وہ قوم ہاری ہوئی مانی جاتی ہے جس سے ایسی چیز پوچھی گئی ہو جسے وہ نہ جانتی ہو اور انہوں نے کہا ہو کہ ہم نہیں جانتے جب تک کہ ہم اپنے نبی سے پوچھ نہ لیں؟ (اس میں ہارنے کی کوئی بات نہیں ہے) البتہ ان لوگوں نے تو اس سے بڑھ کر بے ادبی وگستاخی کی بات کی، جنہوں نے اپنے نبی سے یہ سوال کیا کہ ہمیں اللہ کو کھلے طور پر دکھا دو، آپﷺ نے فرمایا: ’’اللہ کے ان دشمنوں کو ہمارے سامنے لاؤ میں ان سے جنت کی مٹی کے بارے میں پوچھتا ہوں، وہ نرم مٹی ہے، جب وہ سب یہودی آ گئے تو انہوں نے کہا: اے ابوالقاسم! جہنم کے نگراں لوگوں کی کتنی تعداد ہے؟ آپﷺ نے اس طرح ہاتھ سے اشارہ فرمایا: ’’ایک مرتبہ دس (انگلیاں دکھائیں) اور ایک مرتبہ نو (کل:۱۹)‘‘ انہوں نے کہا: ہاں، (آپ نے درست فرمایا) اب آپﷺ نے پلٹ کر ان سے پوچھا: ’’جنت کی مٹی کاہے کی ہے؟‘‘ راوی کہتے ہیں: وہ لوگ تھوڑی دیر خاموش رہے، پھر کہنے لگے: ابوالقاسم! وہ روٹی کی ہے، آپ نے فرمایا: ’’روٹی میدہ (نرم مٹی) کی ہے‘‘۱؎۔
امام ترمذی کہتے ہیں:
۱۔ یہ حدیث غریب ہے۔
۲۔ ہم اسے مجالد کی روایت سے صرف اسی سند سے جانتے ہیں۔