جامع ترمذی: كتاب: قرآن کریم کی تفسیر کے بیان میں (باب: سورہ واللیل إذا یغشی سیبعض آیات کی تفسیر)

ترجمۃ الباب:

3344.

علی ؓ کہتے ہیں: ہم (قبرستان) بقیع میں ایک جنازہ کے ساتھ تھے، نبی اکرم ﷺ بھی تشریف لے آئے، آپﷺ بیٹھ گئے، ہم لوگ بھی آپﷺ کے ساتھ بیٹھ گئے، آپﷺ کے ہاتھ میں ایک لکڑی تھی، آپﷺ اس سے زمین کرید نے لگے، پھر آپﷺ نے اپنا سر آسمان کی طرف اٹھایا اور فرمایا: ’’ہرمتنفس کا ٹھکانہ (جنت یا جہنم) پہلے سے لکھ دیا گیا ہے، لوگوں نے کہا: اللہ کے رسولﷺ! کیوں نہ ہم اپنے نوشتہ (تقدیر) پر اعتماد وبھروسہ کر کے بیٹھ رہیں؟ جو اہل سعادہ نیک بختوں میں سے ہو گا وہ نیک بختی ہی کے کام کرے گا، اور جو بد بختوں میں سے ہو گا وہ بدبختی ہی کے کام کرے گا، آپﷺنے فرمایا: ’’نہیں بلکہ عمل کرو، کیونکہ ہر ایک کو توفیق ملے گی، جو نیک بختوں میں سے ہو گا، اس کے لیے نیک بختی کے کام آسان ہوں گے اور جو بدبختوں میں سے ہو گا اس کے لیے بدبختی کے کام آسان ہوں گے، پھر آپﷺ نے (سورہ واللیل کی) آیت ﴿فَأَمَّا مَنْ أَعْطَى وَاتَّقَى وَصَدَّقَ بِالْحُسْنَى فَسَنُيَسِّرُهُ لِلْيُسْرَى وَأَمَّا مَنْ بَخِلَ وَاسْتَغْنَى وَكَذَّبَ بِالْحُسْنَى فَسَنُيَسِّرُهُ لِلْعُسْرَى﴾۱؎۔
امام ترمذی کہتے ہیں: یہ حدیث حسن صحیح ہے۔