جامع ترمذی: كتاب: قرآن کریم کی تفسیر کے بیان میں (باب: سورہ نصر سے بعض آیات کی تفسیر​)

ترجمۃ الباب:

3362.

عبداللہ بن عباس ؓ کہتے ہیں: نبی اکرم ﷺ کے صحابہ ؓ کی موجود گی میں عمر ؓ مجھ سے (مسئلہ) پوچھتے تھے (ایک بار) عبدالرحمن بن عوف ؓ نے ان سے کہا: آپ ان ہی سے کیوں پوچھتے ہیں جب کہ ہمارے بھی ان کے جیسے بچے ہیں (کیا بات ہے؟) عمر ؓ نے انہیں جواب دیا وہ جس مقام ومرتبہ پر ہے وہ آپ کو معلوم ہے۔ پھر انہوں نے ان سے اس آیت ﴿إِذَا جَاءَ نَصْرُ اللَّهِ وَالْفَتْحُ﴾ کے بارے میں پوچھا، (ابن عباس کہتے ہیں:) میں نے کہا: اس میں رسول اللہ ﷺ کی وفات کی خبر ہے، اللہ نے آپﷺ کو آگاہ کیا ہے، انہوں نے یہ پوری سورہ شروع سے آخر تک پڑھی، عمر ؓ نے ان سے کہا: قسم اللہ کی! میں نے اس سورہ سے وہی سمجھا اور جانا جو تو نے سمجھا اور جانا ہے۱؎۔
امام ترمذی کہتے ہیں:
۱۔ یہ حدیث حسن صحیح ہے۔