جامع ترمذی: كتاب: فضائل و مناقب کے بیان میں (باب: عباس بن عبد المطلبؓ کے مناقب)

ترجمۃ الباب:

3758.

عبدالمطلب بن ربیعہ بن حارث بن عبدالمطلب نے بیان کیا کہ عباس بن عبدالمطلب رسول اللہ ﷺ کے پاس غصہ کی حالت میں آئے، میں آپﷺ کے پاس بیٹھا ہوا تھا، آپﷺ نے پوچھا: تم غصہ کیوں ہو؟ وہ بولے: اللہ کے رسولﷺ! قریش کو ہم سے کیا (دشمنی) ہے کہ جب وہ آپس میں ملتے ہیں تو خوش روئی سے ملتے ہیں اور جب ہم سے ملتے ہیں تو اور طرح سے ملتے ہیں، (یہ سن کر) رسول اللہ ﷺ غصہ میں آ گئے، یہاں تک کہ آپﷺ کا چہرہ سرخ ہو گیا، پھر آپﷺ نے فرمایا: ’’قسم ہے اس ذات کی جس کے ہاتھ میں میری جان ہے! کسی شخص کے دل میں ایمان داخل نہیں ہو سکتا جب تک کہ وہ اللہ اور اس کے رسولﷺ کی خاطر تم سے محبت نہ کرے‘‘، پھر آپﷺ نے فرمایا: ’’اے لوگو! جس نے میرے چچا کو اذیت پہنچائی تو اس نے مجھے اذیت پہنچائی کیوں کہ آدمی کا چچا اس کے باپ کے مثل۱؎ ہوتا ہے‘‘۔
امام ترمذی کہتے ہیں: یہ حدیث حسن صحیح ہے۔