جامع ترمذی: كتاب: جنازے کے احکام ومسائل (باب: تہائی یاچوتھائی مال کی وصیت کرنے کا بیان​)

ترجمۃ الباب:

975.

سعد بن مالک (سعد بن ابی وقاص) ؓ کہتے ہیں: رسول اللہ ﷺ نے میری عیادت فرمائی، میں بیمار تھا۔ توآپﷺ نے پوچھا: ’’کیا تم نے وصیت کردی ہے؟‘‘ میں نے عرض کیا: جی ہاں (کردی ہے)، آپﷺ نے فرمایا: ’’کتنے کی؟‘‘ میں نے عرض کیا: اللہ کی راہ میں اپنے سارے مال کی۔ آپﷺ نے پوچھا: ’’اپنی اولادکے لیے تم نے کیاچھوڑا؟‘‘ میں نے عرض کیا: وہ مال سے بے نیازہیں، آپ نے فرمایا: ’’دسویں حصے کی وصیت کرو۔‘‘ تو میں برابراسے زیادہ کراتا رہا یہاں تک کہ آپﷺ نے فرمایا: ’’تہائی مال کی وصیت کرو، اور تہائی بھی زیادہ ہے۔‘‘ ابوعبدالرحمن (نسائی) کہتے ہیں: ہم لوگ رسول اللہ ﷺ کے اس فرمان کی وجہ سے کہ ’’تہائی مال کی وصیت بھی زیادہ ہے‘‘ مستحب یہی سمجھتے ہیں کہ تہائی سے بھی کم کی وصیت کی جائے۔
امام ترمذی کہتے ہیں:
۱۔ سعد ؓ کی حدیث حسن صحیح ہے۔
۲۔ سعد ؓ سے یہ حدیث دوسرے اور طرق سے بھی مروی ہے۔
۳۔ اس باب میں ابن عباس ؓ سے بھی روایت ہے۔ اوران سے «والثلث كثير» کی جگہ «والثلث كبير» (تہائی بڑی مقدارہے) بھی مروی ہے۔
۴۔ اہل علم کا اسی پر عمل ہے، وہ اس بات کوصحیح قرارنہیں دیتے کہ آدمی تہائی سے زیادہ کی وصیت کرے اورمستحب سمجھتے ہیں کہ تہائی سے کم کی وصیت کرے۔
۵۔ سفیان ثوری کہتے ہیں: لوگ چوتھائی حصہ کے مقابل میں پانچویں حصہ کو اور تہائی کے مقابلے میں چوتھائی حصہ کومستحب سمجھتے تھے، اور کہتے تھے کہ جس نے تہائی کی وصیت کردی اس نے کچھ نہیں چھوڑا۔ اور اس کے لیے تہائی سے زیادہ جائزنہیں۔