لغوی معنی : لغت میں نکاح کا مطلب : [الضم والجمع]’’ ملانا اور جمع کرنا‘‘ ہے  جبکہ نکاح کا اطلاق حقیقتاً وطی ( ہم بستری کرنے ) پر اور مجازا عقد نکاح پر ہوتا ہے ۔اصطلاحی تعریف : فقہائے کرام نے نکاح کی کئی ایک تعریفات کی ہیں جن میں سے ایک یہ ہے :[هو عقد يتضمن اباحة وط ء بلفظ الانكاح والتزوج وما اشتق منهما] یعنی ’’ نکاح ایسا عقد ہے جس سے وطی جائز قرار پاتی ہے اور یہ لفظ انکاح ( میں نے تیرا نکاح کیا) یا تزویج ( میں نے تیری شادی کی ) یا ان سے مشتق ( اور ہم معنی ) دوسرے الفاظ سے منعقد ہوتا ہے‘‘نکاح کی مشروعیت: نکاح سابقہ انبیائے کرام علیہم السلام کی بھی سنت ہے جیسا کہ ارشاد باری تعالیٰ ہے : (وَلَقَدْ أَرْ‌سَلْنَا رُ‌سُلًا مِّن قَبْلِكَ وَجَعَلْنَا لَهُمْ أَزْوَاجًا وَذُرِّ‌يَّةً) ( الرعد 13: 38) ’’ ہم آپ سے پہلے بھی بہت سے رسول بھیج چکے ہیں اور ہم نے ان سب کو بیوی بچوں والا بنایا تھا ۔‘‘اس طرح انبیائے کرام لوگوں کے لیے بہترین نمونہ تھے اور ان کا طرزعمل بہترین اسوہ حسنہ تھا ، لہذا انہوں نے خود بھی بکثرت شادیاں کیں اور امت کو بھی اس کی وصیت کی ۔ مؤرخین نے حضرت یحیٰ اور حضرت عیسیٰ ؑ  کے سوا کسی کا غیر شادی شدہ ہونا ذکر نہیں کیا ۔ حضرت عیسیٰ علیہ السلام کے شادی نہ کرنے کے متعلق یہ کہا جاتا ہے کہ اس وقت کی عورتیں انتہائی بگڑ چکی تھیں اور ان کے اخلاق برباد ہو چکے تھے ، لہذا کسی صالحہ عورت کے نہ ملنے کی وجہ سے آپ نے شادی نہ کی ۔ واللہ اعلم شریعت محمدیہ میں شادی ایک مقدس رشتہ ہے اور انسان کی جنسی او رفطری خواہشات کی تکمیل و تسکین کا ایک مہذب طریقہ بھی ، لہذا مرد و زن کی اس ضرورت کو پورا کرنے کے لیے اللہ تعالیٰ نے حکم فرمایا : (فَانكِحُوا مَا طَابَ لَكُم مِّنَ النِّسَاءِ مَثْنَىٰ وَثُلَاثَ وَرُ‌بَاعَ) ( النساء 4:3) ’’ عورتوں میں سے جو بھی تمہیں اچھی لگیں تم ان سے نکاح کر لو ، دو دو ، تین تین اور چار چار سے ۔‘‘رسول اکرم ﷺ نے اس سلسلے میں بہترین اسوہ امت کے لیے چھوڑا ہے بلکہ امت کے نوجوانوں کو زبردست ترغیب دلائی ہے ، ارشاد فرمایا : (يَا مَعْشَرَ الشَّبَابِ مَنْ اسْتَطَاعَ مِنْكُمْ الْبَاءَةَ فَلْيَتَزَوَّجْ فَإِنَّهُ أَغَضُّ لِلْبَصَرِ وَأَحْصَنُ لِلْفَرْجِ وَمَنْ لَمْ يَسْتَطِعْ فَعَلَيْهِ بِالصَّوْمِ فَإِنَّهُ لَهُ وِجَاء)( صحیح مسلم ، النکاح ، باب استحباب النکاح ..، حدیث :1400) ’’اے نوجوانو ! تم میں سے جو نکاح کی استطاعت رکھے وہ نکاح کرلے ، اس لیے کہ نکاح آنکھوں کو نیچا کرتا ہے اور شرمگاہ کو محفوظ رکھتا ہے اور جو شخص خرچ کی طاقت نہ رکھے وہ ضرور روزہ رکھے کیونکہ روزہ اس کی خواہش نفس کو ختم کر دے گا۔‘‘اس طرح سے رہبر امت نے نوجوانوں کے جذبات کو شاندار طریقے سے محفوظ بنایا ۔ ان کی عفت و عصمت اور شرم و حیا کی حفاظت کے لیے بہترین علاج تجویز فرمایا۔مشروعیت نکاح  کی اہمیت :  اللہ تعالیٰ نے انسانوں کو بے شمار منافع اور مصالح کے حصول کے لیے نکاح مشروع فرمایاہے ۔ ان میں سے ایک یہ ہے کہ انسان اللہ تعالیٰ کا زمین میں خلیفہ ہے ۔ اس بار خلافت کو نبھانے کے لیے مضبوط ، صالح اور بلند کردار کے حامل لوگوں کی ضرورت تھی جو صرف اور صرف نکاح شرعی سے حاصل ہو سکتے ہیں ۔ نکاح کے بغیر پیدا ہونے والے افراد اس اعلیٰ منصب کے اہل نہیں ہو سکتے ، لہذا صالح نسل کی بقا کے لیے نکاح بے حد ضروری ٹھہرا ۔ یہی صالح نسل خلیفۃ اللہ بنے گی اور اپنے والدین کے لیے زینت اور ان کی آنکھوں کی ٹھنڈک ہو گی ۔ والدین کے فوت ہونے پر یہ ان کے لیے بہترین کمائی ثابت ہوں گے جب وہ ان کے لیے دعائے مغفرت کریں گے۔نکاح انسان کو بدکاری ’بے حیائی ‘ جنسی آلودگی اور شیطانی وساوس سے محفوظ کرتا ہے ۔ طرفین میں مودت و محبت ، راحت و سکون اور دین کی تکمیل کا ذریعہ ہے ۔ دو خاندانوں میں قربت ، محبت اور اتحاد و اتفاق کا ضامن ہے ۔ ان سب سے بڑھ کر یہ ہے کہ نکاح سے پیدا ہونے والی اولاد کی بدولت امام الانبیاء ﷺ قیامت کے روز دوسری امتوں پر فخر کریں گے ۔ آپ ﷺ کا ارشاد گرامی ہے : [تَزَوَّجُوا الْوَدُودَ الْوَلُودَ فَإِنِّي مُكَاثِرٌ بِكُمْ الْأُمَمَ] ( سنن ابی داؤد ، النکاح ، باب النہی عن تزویج من لم یلد من النساء ، حدیث : 2050)‘‘خوب محبت کرنے والی اور زیادہ بچے جننے والی عورت کا نکاح کرو کیونکہ میں تمہاری کثرت کی وجہ سے دوسری امتوں پر فخر کروں گا۔‘‘نکاح کا حکم : نکاح کے مندرجہ بالا قوائد کی روشنی میں علمائے امت نے مختلف افراد کے لحاظ سے نکاح کا حکم بیان کیا ہے ۔ اس کی تفصیل یوں ہے :فرض : ایسے شخص کے لیے نکاح کرنا فرض ہے جو جسمانی لحاظ سے صحت مند ہو اور شادی کے اخراجات ، نیز بیوی کے اخراجات پورے کرنے کی طاقت رکھتا ہو ، زنا اور بدکاری میں مبتلا ہونے کا اسے خوف ہو اور روزے رکھنے سے بھی یہ خوف دور نہ ہو ۔حرام : جو شخص جسمانی طور پر شادی کا اہل نہ ہو یا وہ بیوی کے اخراجات پورے کرنے کی طاقت نہ رکھتا ہو یا وہ پہلی بیوی پر ظلم کے ارادے سے دوسری شادی کرنا چاہتا ہو تو ایسے شخص کے لیے شادی کرنا حرام ہے ۔مکروہ : ایسا شخص جو طبعا سخت ہو اور درتا ہو کہ وہ شادی کے بعد بیوی پر ظلم کرے گا تو ایسے شخص کے لیے شادی کرنا مکروہ ہے ۔مستحب : جو شخص معتدل مزاج ہو ، اسے زنا اور بدکاری کا بھی ڈر نہ ہو اور وہ نان و نفقہ کی طاقت بھی رکھتا ہو تو اس کا نکاح کرنا مستحب ہے ۔نکاح کی اقسام : اسلام نے عربوں میں رائج ، شادی بیاہ کے متعدد طریقوں کو کالعدم قرار دے دیا اور ان سب کی جگہ مسنون نکاح کو مشروع ٹھہرایا ۔ ایسا نکاح جس میں طرفین کی رضامندی ، ولی کی موجودگی ، حق مہر کی تعیین اور گواہوں کی موجودگی ہو ۔ اس نکاح کے علاوہ موجودہ دور میں کسی نہ کسی شکل میں رائج دیگر طریقوں کو اسلام نے حرام کر دیا ہے ، جیسے نکاح حلالہ ، نکاح متعہ اور وٹہ سٹہ ۔ اور اسی طرح ولی کی اجازت کے بغیر لو میرج ( محبت کی شادی ) سیکرٹ میرج ( خفیہ شادی ) اور کوٹ میرج ( عدالتی شادی ) وغیرہ۔نکاح کے لیے محرم رشتے : اسلام نے نیک اور مومن عورتوں سے نکاح کی اجازت دینے کے بعد چند رشتوں کو مستثنیٰ قرار دیا ہے تاکہ ان رشتوں کا باہمی تقدس برقرار رہے ۔ ان رشتوں کی تفصیل سورہ نساء کی آیت : 22 تا 24 میں مذکور ہے ۔ ان کے علاوہ بعض عورتوں سے نکاح عارضی طور پر حرام ہوتا ہے وہ یہ ہیں :بیوی کی بہت سے نکاح جبکہ بیوی ابھی نکاح میں ہو ۔ بیوی کی پھوپھی یا خالہ کو بیوی کے ساتھ جمع کرنا۔ منکوحہ عورت سے نکاح۔عدت کے دوران میں نکاح کرنا۔پاکدامن مرد و خواتین کا مشرک مرد و خواتین سے نکاح۔(حَتَّىٰ تَنكِحَ زَوْجًا غَيْرَ‌هُ) ( البقرۃ 2: 230) ’’ یہاں تک کہ وہ کسی دوسرے خاوند سے شادی کرے ۔‘‘ کی قرآنی قید کو نظر انداز کر کے طلاق بائنہ کے بعد اپنی مطلقہ عورت سے نکاح کرنا۔