لغوی معنی :لغت میں حج کے  معنی "قصد کرنا"ہیں جبکہ امام نحو خلیل فرماتے ہیں:"حج کے معنی ہیں: جس کی آپ تعظیم کرتے ہو  اس کا بکثرت قصد کرنا۔امام جوہری کہتے ہیں :"پھر بعد میں حج سے مراد عبادت کے لیے مکہ مکرمہ کا قصد کرنا معروف ہو گیا۔"اصطلاحی تعریف: فقہائےکرام نے حج کی تعریف یوں کی ہے:(هو قصد موضع مخصوص وهو البيت’بصفة مخصوصة في وقت مخصوص بشرائط مخصوصة )’’حج مخصوص شرائط کے ساتھ 'خاص وقت میں'مخصوص حالت کے ساتھ بیت اللہ کا قصد کرنے کا نام ہے۔٭مشروعیت حج : اللہ تعالی نے صاحب استطاعت مسلمانوں پر اپنے گھر حاضر ہونا اور عبادت کرنا فرض قراردیا ہے،ارشاد باری تعالی ہے:(ولله على الناس حج البيت من استطاع اليه سبيلا) (آل عمران 3/97) ’’ اللہ تعالی نے ان لوگوں پر جو اس کی طرف راہ پاسکتےہیں اس گھر کا حج فرض کردیا ہے۔‘‘جبکہ رسول اللہ ﷺ نے اس کو اسلام کا ایک اہم رکن بتایا  ہے۔آپ نے فرمایا:[بني الاسلام علي خمس :شهادة ان لااله الاالله وان محمدارسول الله واقام الصلوة وايتاءالزكاة والحج وصوم رمضان ) (صحيح البخاري’الايمان’باب:دعائكم ايمانكم ۔۔۔۔حديث:٨]’’اسلام کی بنیاد پانچ چیزوں پر ہے:اس بات کی گواہی دینا کہ اللہ کے سوا کوئی معبود برحق نہیں اور محمدﷺاللہ کے رسول ہیں'نماز قائم کرنا'زکاۃ دینا'حج کرنا اور رمضان کے روزے رکھنا۔‘‘مشروعیت حج کی حکمت جاننے کے لیے علمائے کرام نے عقلاًکوشش کی ہے اور اس سلسلے میں مندرجہ ذیل نکات بیان  فرمائے ہیں:1۔حصول عجزوانکسار:اللہ تعالی نے انسانی نفوس کو اپنے ذکر پر ابھارنے اور اپنی عظمت  کے سامنے عاجز بنانے کے لیے کچھ عرصے کے لیے ان کو گھروں سے نکال کر ایک مخصوص  جگہ پر جمع ہونے کا حکم دیا ہے۔اللہ تعالی کے شعائر کو دیکھ کراور اس کی مقررہ حدود کے اندر ٹھر کر ان کے دلوں میں اپنے رب کی عظمت وجلال کا اضافہ ہوتا ہے۔2۔قیامت کی یاد دہانی: جس طرح لاکھوں مسلمان اپنے گھروں سے نکل کر ایک کھلے میدان میں جمع ہوتے ہیں اسی طرح روز قیامت ایک کھلے  میدان میں جمع ہوکراپنے اعمال کے جوابدہ ہوں گے۔اس طرح حج انھیں آخرت کی یاد دہانی  کراتا ہے۔3۔رحمت الہی کا حصول: جب لاکھوں لوگ یک رنگ اور یک زبان ہو کر اپنے رب کے سامنے گریہ زاری کرتے ہیں تو انھیں رحمت ربانی حاصک ہوتی ہے۔4۔سابقہ امتوں کی رہبانیت کے ثواب کا حصول: حاجی ہزار میل کا سفر کرکے وطن'اہل خانہ اوراقرباء کو چھوڑ کر اللہ کے حکم پر مکہ مکرمہ پہنچتا ہے۔اس طرح اسے عظیم ثواب حاصل ہوتا ہے۔5۔انسانیت کے لیے رحمت وشفقت کے جذبات کا پیدا ہونا: اتنے بڑے ہجوم میں لوگوں کے ساتھ چند دن گزارنا انتہائی صبر آزما ہوتاہے۔اس طرحدوسروں کی ایذا پر صبر کر کےدوسروں کے ساتھ مل جل کر رہنے کی تعلیم ملتی ہے جس  سے باہمی مودت ومحبت پیدا ہوتی ہے۔٭حج  کی فضیلت واہمیت:حج ایک بابرکت عبادت ہے جس سے نہ صرف گزشتہ تمام گناہ معاف  ہوجاتے ہیں بلکہ جنت کا حصول  آسان ہوجاتا ہے۔پے درپے حج وعمرہ محتاجی اور1فقر کا شافی علاج بھی ہے۔رسول اللہﷺ کے ارشادات مبارکہ پر ایک نظر ڈالنے  سے یہ حقیقت  پوری طرح عیاں ہوجاتی ہے۔آپ نے فرمایا:[ العمرة الي العمرة كفارة لما بينهما والحج المبرور ليس له جزاء الا الجنة] ( صحيح البخاري’العمرة’باب وجوب العمرة وفضلها’حديث:1773)"عمرہ ان تمام گناہوں کا کفارہ ہےجو موجودہ اور گزشتہ عمرے کے درمیان سرزد ہوئے ہوں اور حج مبرور کا بدلہ تو جنت ہی ہے۔" نیز فرمایا: (من  حج لله فلم  يرفث ولم  يفسقرجع كيوم ولدته امه (صحيح البخاري’الحج ’باب فضل الحج المبرور’حديث:1521 ) ’’ جس نے اللہ تعالی کی رضا کے لیے حج کیااور اس دوران میں کوئی بے ہودہ بات یا گناہ نہ کیا تو وہ حج کرکے اس دن کی طرح(گناہوں سے پاک)لوٹے گاجس طرح اس کی ماں نے اسے (گناہوں سے پاک)جنا تھا۔‘‘حضرت عمر ﷜  نبیﷺ کا یہ فرمان مبارک نقل  کرتے ہیں کہ آپ نے فرمایا:"پے درپے حج اور عمرہ کرو'بے شک یہ دونوں فقراور گناہوں کو اس طرح دور کردیتے ہیں جس طرح بھٹی لوہے کے میل کچیل کو دور کردیتی ہے۔" (سنن ابن ماجہ'حدیث:2887)سرکار دوعالم ﷺ کا یہ فرمان نقل کرنے والے حضرت عمر فاروق رضی اللہ  عنہ صاحب استطاعت مسلمان کے حج نہ کرنے پر سخت ناراض دکھائی دیتے ہیں،فرماتے ہیں: "میں نے ارادہ کیا کہ میں کچھ آدمیوں کو شہروں میں بھیجوں وہ تحقیق کریں کہ جن لوگوں نے طاقت ہونے کے باوجود  حج نہیں کیا ان پر جزیہ مقرر کردیں۔ایسے لوگ مسلمان نہیں ہیں۔  (نيل الاوطار’كتاب المناسك’باب وجوب الحج علي الفور:4/ 317 )٭ حج کی اقسام: حج کی مندرجہ ذیل اقسا م ہیں:1۔حج تمتع: وہ حج جس میں حاجی عمرے کا احرام باندھ کر مکہ مکرمہ میں آتا ہے اور عمرہ ادا کرنے کے بعد احرام  کھول دیتا ہے'پھر 8 ذی الحجہ کو دوبارہ  حج کا احرام باندھ کر مناسک حج ادا کرتا ہے۔2۔حج افراد: میقات سے صرف حج کا احرام باندھنا اور پھر مناسک حج کی ادائیگی تک احرام ہی میں رہنا۔اس  میں قربانی کرنا جروری نہیں ہوتا۔3۔حج قران:وہ حج جس میں حاجی عمرے اور حج کی نیت سے احرام  باندھ کر مکہ مکرمہ پہنچتا ہے۔اس میں عمرے میں سعی کرکے حجامت نہیں کروائی جاتی بلکہ مناسک حج تک احرام کی پابندیاں باقی رہتی ہیں۔ایسا کرنے والوں کے لیے قربانی ساتھ لے کر جانا مسنون ہے۔ان کے لیے قربانی کرنا واجب ہے۔میقات حج: رسول اکرم ﷺ نے حج کے لیے مندرجہ زیل میقات مقرر کیے:1۔ذوالحلیفہ: اہل مدینہ اور ان کے راستے سے آنے والوں کے لیے ہے۔اسے آج کل  آبار علي کہتے ہیں۔یہ مکہ مکرمہ سے تقریباً450 کلو میٹر کے فاصلے پر ہے۔2 ۔الجحیفہ: شام'مصر'ترکی'یورپ اور امریکہ والوں کے لیے ہے۔اب یہ بستی موجود نہیں مگر قریب ہی رابغ نامی جگہ سے لوگ احرام باندھتے ہیں۔یہ مکہ سے شمال مغرب میں187 کلو میٹر کے فاصلے پر واقع ہے۔3۔قرن المنازل: اہل نجد اور عرفات وغیرہ کی طرف سے آنے والوں کا میقات ہے۔اسے آج کل السيل  کہتے ہیں۔یہ مکہ سے 94 کلو میٹر دور ہے۔4۔ذات العرق: عراق وغیرہ کی طرف سے آنے والوں کا میقات ہے۔اب یہ بستی موجود نہیں مگر قریب ہی الضريبه  نامی جگہ سے لوگ احرام باندھتے ہیں جسے  خريبات  بھی کہتے ہیں۔یہ مکہ سے شمال مشرق میں 94 کلو میٹر کے فاصلےپر ہے۔5۔یلملم: بیت اللہ کے جنوب میں ایک مقام ہے جو یمن'چین'بنگلہ دیش'افغانستان'بھارت اور پاکستان وغیرہ  کی طرف سے آنے والوں کا میقات ہے۔یہ مکہ مکرمہ سے 92کلو میٹر پرواقع ہے۔اسے آج کل السعديه  کہتے ہیں۔