سنن نسائی: کتاب: جہاد سے متعلق احکام و مسائل (باب: جس شخص کو دشمن نیزہ مارے تو وہ (زخم خوردہ) کیا کہے؟)

ترجمۃ الباب:

3149. حضرت جابر بن عبداللہ ؓ فرماتے ہیں: جب احد کا دن تھا اور لوگ بھاگ کھڑے ہوئے تو رسول اللہﷺ بارہ انصاریوں کے حصار میں (میدان کے) ایک کنارے میں (ڈٹے ہوئے) تھے۔ ان میں (ایک مہاجر) حضرت طلحہ بن عبید اللہ ؓ بھی موجود تھے۔ مشرکوں نے انہیں گھیرا تو رسول اللہﷺ اپنے ساتھیوں کی طرف متوجہ ہوئے اور فرمایا: ’’کون دشمنوں کا مقابلہ کرے گا؟‘‘ حضرت طلحہ نے کہا: میں۔ رسول اللہﷺ نے فرمایا: ’’تو جس جگہ ہے وہیں ٹھہرا رہے‘‘ ایک انصاری نے عرض کیا: اے اللہ کے رسول! میں مقابلہ کرتا ہوں۔ فرمایا: ’ہاں‘ تو مقابلہ کر۔‘‘ اس نے لڑائی کی حتیٰ کہ وہ شہید ہوگیا۔ آپ نے پھر توجہ فرمائی تو مشرک ابھی تک موجود تھے۔ آپ نے فرمایا: ’’کون دشمنوں کا مقابلہ کرے گا؟‘‘ حضرت طلحہ نے کہا: میں۔ آپ نے فرمایا: ’’تو جہاں ہے وہیں رہ۔‘‘ ایک اور انصاری نے کہا: اے اللہ کے رسول! میں۔ فرمایا: ’’ہاں‘ تو مقابلہ کر۔‘‘ اس نے لڑائی لڑی حتیٰ کہ وہ بھی شہید ہوگیا۔ آپ برابر یہی فرماتے رہے اور ایک ایک انصاری نکلتا رہا اور اپنے پیشرو کی طرح لڑائی کرتا رہا اور شہید ہوتا رہا حتیٰ کہ رسول اللہﷺ اور حضرت طلحہ بن عبید اللہ ؓ ہی باقی رہ گئے۔ رسول اللہﷺ نے فرمایا: ’’کون دشمنوں کا مقابلہ کرے گا؟‘‘ حضرت طلحہ نے کہا: میں کیا کروںگا۔ اور انہوں نے لڑائی شروع کردی۔ اور وہ اپنے پیشرو گیارہ انصاریوں کی طرح لڑے حتیٰـ کہ ان کے ہاتھ پر تلوار لگی اور انگلیاں کٹ گئیں۔ تو ان کے منہ سے ’’حَسَّ‘‘ (اوئی وغیرہ) نکلا۔ رسول اللہﷺ نے فرمایا: ’’(جب تجھے زخم لگاتھا) اگر تو بسم اللہ کہتا تو تجھے فرشتے اٹھا لیتے۔ اور لوگ دیکھتے رہتے۔‘‘ پھر اللہ تعالیٰ نے مشرکوں کو پھیر دیا۔