’’ضِب‘‘ جنگلی چوہے کے مشابہ ایک جانور ہے لیکن اس سے بڑا ہوتا ہے۔ اس کی مادہ کو ’’ ضبّة‘‘ کہا جاتا ہے۔ اسی مناسبت سے ایک قبیلے کا نام بھی ضبہ ہے۔ منیٰ کے قریب وادی خیف میں ایک پہاڑ کو بھی ’’ضب‘‘ کہا جاتا ہے۔ اونٹ کے پاؤن میں ایک بیماری ہوتی ہے اس کا نام بھی ’’ضب‘‘ ہے۔ ماہرین حیوانات نے ضب، یعنی سانڈے کے متعلق بڑی عجیب وغریب باتیں بھی کی ہیں، مثلاً: یہ کہا جاتا ہے کہ ضب (سانڈا) سات سو برس زندہ رہتا ہے، وہ پانی نہیں پیتا اور چالیس دنوں میں ایک قطرہ پیشاب کرتا ہے۔ اور اس کا کوئی دانت نہیں گرتا۔ اور یہ بھی کہا جاتا ہے کہ سانڈے کے دانت (الگ الگ نہیں ہوتے بلکہ) ایک ہی قطعہ ہوتے ہیں۔ سانڈے کا گوشت کھانے سے پیاس ختم ہو جاتی ہے۔ اہل عرب کے ہاں یہ ضرب المثل بھی معروف ہے کہ جب کسی شخص نے کوئی کام نہ کرنا ہو تو وہ کہتا ہے: (لَا اَفْعَلُ کَذَا حَتّٰی یَرِدَ الضِّبُّ) ’’میں یہ کام نہیں کروں گا یہاں تک کہ ضب پانی (پینے کے لیے گھاٹ) پر آئے۔‘‘ یہ ضرب المثل اس لیے بولی جاتی ہے کہ سانڈا پانی پینے کے لیے گھاٹ، تالاب یا چشمے وغیرہ پر نہیں آتا بلکہ اسے باد نسیم، زمین کی نمی اور ٹھنڈی ہوا کافی ہو جاتی ہے اور اس کو پانی پینے کی چنداں ضرورت نہیں رہتی۔ سردیوں میں تو سانڈا اپنی بل سے نکلتا ہی نہیں۔ مزید دیکھیے: (فتح الباری: 9/ 820)