جامع ترمذی: كتاب: خریدوفروخت کے احکام ومسائل (باب: جسے بیع میں دھوکہ دے دیا جاتاہووہ کیاکرے؟​)

ترجمۃ الباب:

1250.

انس ؓ کہتے ہیں کہ ایک آدمی خرید وفروخت کرنے میں بودا ۱؎ تھا اور وہ (اکثر) خریدوفروخت کرتا تھا، اس کے گھر والے نبی اکرمﷺ کے پاس آئے اوران لوگوں نے عرض کیا: اللہ کے رسولﷺ! آپﷺ اس کو (خریدوفروخت سے) روک دیجیے، تو نبی اکرمﷺنے اس کو بلوایا اور اسے اس سے منع فرما دیا۔ اس نے عرض کیا: اللہ کے رسولﷺ! میں بیع سے باز رہنے پر صبر نہیں کرسکوں گا، آپﷺ نے فرمایا: (اچھا) جب تم بیع کرو تو یہ کہہ لیا کروکہ ایک ہاتھ سے دواور دوسرے ہاتھ سے لو اور کوئی دھوکہ دھڑی نہیں ۲؎۔
امام ترمذی کہتے ہیں:
۱۔ انس کی حدیث حسن صحیح غریب ہے۔
۲۔ اس باب میں ابن عمر سے بھی روایت ہے۔
۳۔ بعض اہل علم کا اسی حدیث پر عمل ہے، وہ کہتے ہیں کہ آزاد شخص کوخریدوفروخت سے اس وقت روکا جاسکتا ہے جب وہ ضعیف العقل ہو، یہی احمد اوراسحاق بن راہویہ کا بھی قول ہے۔
۴۔ اوربعض لوگ آزاد بالغ کو بیع سے روکنے کو درست نہیں سمجھتے ہیں۳؎۔