جامع ترمذی: كتاب: حج کے احکام ومسائل (باب: عرفات میں ٹھہر نے اور دعاکرنے کا بیان​)

ترجمۃ الباب:

884.

ام المومنین عائشہ‬ ؓ ک‬ہتی ہیں: قریش اور ان کے ہم مذہب لوگ (اور یہ حُمس۱؎ کہلاتے ہیں) مزدلفہ میں وقوف کرتے تھے اور کہتے تھے: ہم تو اللہ کے خادم ہیں۔ (عرفات نہیں جاتے)، اور جو ان کے علاوہ لوگ تھے وہ عرفہ میں وقوف کرتے تھے تو اللہ نے آیت کریمہ ﴿ثُمَّ أَفِيضُوا مِنْ حَيْثُ أَفَاضَ النَّاسُ﴾ (البقرۃ: ۱۹۹) ’’اور تم بھی وہاں سے لوٹو جہاں سے لوگ لوٹتے ہیں‘‘ نازل فرمائی۔
امام ترمذی کہتے ہیں:
۱- یہ حدیث حسن صحیح ہے۔
۲- اس حدیث کے معنی یہ ہیں کہ اہل مکہ حرم سے باہر نہیں جاتے تھے اور عرفہ حرم سے باہر ہے۔ اہل مکہ مزدلفہ ہی میں وقوف کرتے تھے اور کہتے تھے: ہم اللہ کے آباد کئے ہوئے لوگ ہیں۔ اور اہل مکہ کے علاوہ لوگ عرفات میں وقوف کرتے تھے تو اللہ نے حکم نازل فرمایا: ’’تم بھی وہاں سے لوٹو جہاں سے لوگ لوٹتے ہیں‘‘ حمس سے مراد اہل حرم ہیں۔