حضرت عبداللہ بن مسعود ﷜: نام و نسب: عبداللہ بن مسعود بن غافل بن حبیب بن شمخ بن فار بن مخزوم الہذلی۔ آپ کی کنیت ابوعبدالرحمٰن ہے۔ آپ کی والدہ  کا نام ام عبد بنت عبدِوَد ہے۔ اسلام کے ابتدائی دور میں مسلمان ہوئے۔ آپ خود فرماتے تھے کہ میں مسلمان ہونے والوں میں چھٹا شخص تھا، اس وقت روئے زمین پر ہمارے علاوہ کوئی مسلمان نہ تھا۔ آپ کو یہ شرف حاصل ہے کہ آپ نے نبی اکرم ﷺ سے براہ راست قرآن مجید کی 70 سورتیں سیکھیں۔ حضرت ابن مسعود ﷜ 32 ہجری میں مدینہ منورہ میں فوت ہوئے اور ان کی وصیت کے مطابق انہیں رات کے وقت دفن کیا گیا۔ اس وقت ان کی عمر تقریبا 63 برس تھی۔٭ حضرت عبداللہ بن مسعود کے خوب صورت کلام کا ایک نمونہ: آپ فرماتے ہیں: جو شخص آخرت کا طالب ہو اسے دنیا کا خسارہ برداشت کرنا ہو گا۔ اور جو شخص دنیا کا خواہش مند ہے اسے آخرت کا خسارہ ہو گا، لہذا، اے لوگو! باقی رہنے والی زندگی کی خاطر فانی دنیا کا خسارہ برداشت کر لو۔