سنن ابن ماجہ: کتاب: سنت کی اہمیت وفضیلت (باب: فرقہ جہمیہ نے جس چیز کا انکار کیا)

ترجمۃ الباب:

193.

حضرت عباس بن عبدالمطلب ؓ سے روایت ہے، انہوں نے فرمایا: میں بطحاء مقام پر ایک جماعت میں تھا۔ مجلس میں رسول اللہ ﷺ بھی تشریف فرما تھے۔ ایک بدلی گزری تو آپ ﷺ نے اس کی طرف دیکھا اور فرمایا: ’’تم لوگ اسے کیا کہتے ہو؟‘‘ انہوں نے کہا: سحاب ۔ فرمایا:’’اور بادل بھی (کہتے ہو۔‘‘) انہوں نے کہا: اور بادل بھی۔ فرمایا: ’’اور ابر بھی۔‘‘ انہوں نے کہا: اور ابر بھی۔ فرمایا: ’’تمہارے خیال میں تم سے آسمان کا فاصلہ کس قدر ہے؟’’ انہوں نے کہا: ہمیں تو معلوم نہیں۔ فرمایا: ’’تم سے اس کا فاصلہ اکہتر یا بہتر یا تہتر سال کا ہے۔ اس سے اوپر آسمان (کی موٹائی) بھی اسی قدر ہے۔’’حتٰی کہ آپ ﷺ نے سات آسمان (اس انداز سے) شمار فرمائے۔ پھر فرمایا: ’’پھر ساتویں آسمان کے اوپر ایک سمندر ہے اس کے اوپر کے حصے اور نیچے کے حصے کے درمیان اتنا فاصل ہے جتنا ایک آسمان سے دوسرے آسمان تک ہے۔ اس سے اوپر آٹھ مینڈھے ہیں (عرش اٹھانے والے فرشتے، جن کی صورت مینڈھوں کی سی ہے۔) ان کے کھروں اور گٹھنوں کے درمیان اتنا فاصلہ ہے جتنا ایک آسمان سے دوسرے آسمان تک ہے۔ پھر ان کی پشتوں پر عرش الٰہی ہے، اس کے اوپر کے حصے اور نیچے کے حصے کے درمیان اتنا فاصل ہے جتنا ایک آسمان سے دوسرے آسمان تک ہے۔ پھر اللہ اس سے بھی اوپر ہے، وہ برکتوں والا اور بلندیوں والا ہے۔‘‘