سنن نسائی: کتاب: جہاد سے متعلق احکام و مسائل (باب: جو شخص اللہ کی راہ میں لڑا اور اس کی تلوار مڑ کر اسی کو لگ گئی اور وہ شہید ہوگیا)

ترجمۃ الباب:

3150. حضرت سلمہ بن اکوع ؓ فرماتے ہیں کہ جب خیبر کی لڑائی ہوئی تو میرے بھائی نے رسول اللہﷺ کی معیت میں خوب لڑائی کی‘ پھر ان کی تلوار مڑ کر انہی کو لگی اور وہ اللہ کے پیارے ہوگئے۔ کچھ اصحاب رسول اللہﷺ نے اس بارے میں چہ مگوئیاں کیں اور ان کی شہادت کے بارے میںشک کیا (اور کہا) کہ یہ آدمی تو اپنے ہتھیار سے مرا ہے۔ حضرت سلمہ ؓ نے کہا کہ رسول اللہﷺ نے خیبر سے واپسی کا سفر شروع فرمایا تو میں نے کہا: اے اللہ کے رسول! کیا آپ مجھے اجازت دیتے ہیں کہ میں آپ کی موجودگی میں کچھ اشعار پڑھ لوں؟ تو رسول اللہﷺ نے اجازت مرحمت فرمائی۔ حضرت عمربن خطاب ؓ نے فرمایا: جو کہنا ہے غور سے کہنا (کوئی شعر خلاف شرع نہ ہو)۔ میں نے یہ شعر پڑھے: ] وَاللّٰہِ لَوْ لاَ اللّٰہُ … وَلاَ صَلَّیْنَا[ ’’اللہ کی قسم! اگر اللہ تعالیٰ کی رحمت نہ ہوتی تو ہم ہدایت نہ پاتے‘ نہ صدقے کرتے‘ نہ نمازیں پڑھتے۔‘‘ رسول اللہﷺ نے فرمایا: ’’تونے صحیح کہا۔‘ (پھر پڑھا:) ] فَأَنزِ لَنْ سَکِیْنَۃً…وَالْمُشْرِکُوْنَ قَدْ بَغَوْا عَلَیْنَا[ ’’اے اللہ! ہم پر سکون واطمینان نازل فر اور ا گر دشمن سے مقابلہ ہو تو ہمیں ثابت قدم رکھنا۔ مشرکوں نے ہم پر ظلم وستم کیے ہیں۔‘‘ جب میں نے اپنے شعر پورے کیے تو رسول اللہﷺ نے فرمایا: ’’یہ شعر کس نے کہے ہیں؟‘‘ میں نے کہا: میرے بھائی نے۔ رسول اللہﷺ نے فرمایا: ’’اللہ اس پر رحم فرمائے۔‘‘ میں نے کہا: اے اللہ کے رسول! اللہ کی قسم! کچھ لوگ اس کے لیے دعائے مغفرت کرنے سے ڈرتے ہیں۔ وہ کہتے ہیں کہ یہ شخص تو اپنے ہتھیار سے مراہے۔ رسول اللہﷺ نے فرمایا: ’’وہ تو بڑی کوشش سے جہاد کرتے ہوئے اللہ کو پیارا ہوا ہے۔‘‘ (حدیث کے راوی) ابن شہاب (امام زہری) نے کہا کہ میں نے مسلمہ بن اکوع ؓ کے بیٹے سے پوچھا تو اس نے اپنے باپ سے اسی (مذکورہ حدیث کی) طرح حدیث بیان کی لیکن یہ بات زیادہ کہی کہ جب میں (سملہ بن اکوع) نے کہا کہ لوگ اس کے لیے دعائے مغفرت کرنے سے ڈرتے تھے۔ تو (یہ سن کر) رسول اللہﷺ نے فرمایا: ’’لوگوں نے غلط کیا‘ وہ تو بڑی کوشش سے جہاد کرتے ہوئے مرا ہے۔ اسے دگنا اجر ملے گا۔‘‘ (یہ فرماتے ہوئے) آپ نے اپنی دوانگلیوں سے اشارہ فرمایا۔