جامع ترمذی: كتاب: قرآن کریم کی تفسیر کے بیان میں (باب: سورہ توبہ سے بعض آیات کی تفسیر​)

ترجمۃ الباب:

3097.

عبداللہ بن عباس رضی الله عنہ کہتے ہیں: میں نے عمر بن خطاب رضی الله عنہ کو کہتے ہوئے سنا کہ جب عبداللہ بن اُبی (منافقوں کا سردار) مرا تو رسول اللہ صلی الله علیہ وسلم اس کی نماز جنازہ پڑھنے کے لیے بلائے گئے، آپﷺ کھڑے ہو کر اس کی طرف بڑھے اور اس کے سامنے کھڑے  ہو کر نماز  پڑھا نے کا ارادہ  کر ہی رہے تھے کہ میں لپک کر آپﷺ کے سینے کے سامنے جا کھڑا ہوا،  میں نے کہا:  اللہ کے رسول! کیا آپ اللہ کے دشمن عبداللہ بن ابی  کی نماز پڑھنے جا رہے ہیں جس نے فلاں فلاں دن ایسا اور ایسا کہا تھا؟  وہ اس کے بے ادبی وبدتمیزی کے دن گن گن کر بیان کرنے لگے، رسول اللہ صلی الله علیہ وسلم مسکراتے رہے یہاں تک کہ جب میں بہت کچھ کہہ گیا (حد سے تجاوز کر گیا) تو آپﷺ نے فرمایا: ’’(بس بس) مجھ سے ذرا پرے جاؤ عمر! مجھے اختیار دیا گیا  ہے تو میں نے اس کے لیے مغفرت طلبی کو ترجیح دی ہے۔ کیوں کہ مجھ سے کہا گیا ہے: ﴿اسْتَغْفِرْ لَهُمْ أَوْ لاَ تَسْتَغْفِرْ لَهُمْ إِن تَسْتَغْفِرْ لَهُمْ سَبْعِينَ مَرَّةً فَلَن يَغْفِرَ اللّهُ لَهُمْ﴾۱؎۔ اگر میں جانتا کہ ستّر بار سے زیادہ  مغفرت طلب کرنے سے وہ معاف کر دیا جائے گا تو ستر بار سے بھی زیادہ میں اس کے لیے مغفرت مانگتا۔  پھر آپﷺ نے عبداللہ بن ابی کی نماز  جنازہ پڑھی اور جنازہ کے ساتھ چلے اور اس کی قبر پر کھڑے رہے، یہاں تک کہ اس کے کفن دفن سے فارغ ہو گئے۔  رسول اللہ صلی الله علیہ وسلم کی شان میں اپنی جرأت وجسارت پر مجھے حیرت ہوئی۔ اللہ اور اس کے رسول زیادہ بہتر جانتے ہیں۲؎۔ قسم اللہ کی! بس تھوڑی ہی دیر ہوئی تھی کہ یہ دونوں آیتیں نازل ہوئیں۔ ﴿وَلاَ تُصَلِّ عَلَى أَحَدٍ مِنْهُمْ مَاتَ أَبَدًا وَلا تَقُمْ عَلَى قَبْرِهِ﴾۳؎۔ اس کے بعد رسول اللہ صلی الله علیہ وسلم نے اپنے مرنے تک کبھی بھی کسی منافق کی نماز جنازہ نہیں پڑھی، اور نہ ہی اس کی قبر پر کھڑے ہو کر دعا فرمائی۔
امام ترمذی کہتے ہیں: یہ حدیث حسن صحیح غریب ہے۔