جامع ترمذی: كتاب: فضائل و مناقب کے بیان میں (باب: نبی اکرم ﷺ کے حلیہ مبارک کابیان​)

ترجمۃ الباب:

3638.

ابراہیم بن محمد جو علی بن ابی طالب ؓ کی اولاد میں سے ہیں ان سے روایت ہے کہ علی ؓ جب نبی اکرم ﷺ کا حلیہ بیان کرتے تو کہتے: نہ آپﷺ بہت لمبے تھے نہ بہت پستہ قد، بلکہ لوگوں میں درمیانی قد کے تھے، آپﷺ کے بال نہ بہت گھونگھریالے تھے نہ بالکل سیدھے، بلکہ ان دونوں کے بیچ میں تھے، نہ آپﷺ بہت موٹے تھے اور نہ چہرہ بالکل گول تھا، ہاں اس میں کچھ گولائی ضرورتھی، آپﷺ گورے سفید سرخی مائل، سیاہ چشم، لمبی پلکوں والے، بڑے جوڑوں والے اور بڑے شانہ والے تھے، آپﷺ کے جسم پر زیادہ بال نہیں تھے، صرف بالوں کا ایک خط سینہ سے ناف تک کھنچا ہوا تھا، دونوں ہتھیلیاں اور دونوں قدم گوشت سے پُر تھے جب چلتے زمین پر پیرجما کر چلتے، پلٹتے تو پورے بدن کے ساتھ پلٹتے، آپﷺ کے دونوں شانوں کے بیچ میں مہر نبوت تھی، آپﷺ خاتم النبیین تھے، لوگوں میں آپﷺ سب سے زیادہ سخی تھے، آپﷺ کھلے دل کے تھے، یعنی آپﷺ کا سینہ بغض وحسد سے آئینہ کے مانند پاک وصاف ہوتا تھا، اور سب سے زیادہ سچ بولنے والے، نرم مزاج اور سب سے بہتر رہن سہن والے تھے، جو آپﷺ کو یکایک دیکھتا ڈر جاتا اور جو آپﷺ کو جان اور سمجھ کر آپﷺ سے گھل مل جاتا وہ آپﷺ سے محبت کرنے لگتا، آپﷺ کی توصیف کرنے والا کہتا: نہ آپﷺ سے پہلے میں نے کسی کو آپﷺ جیسا دیکھا ہے اور نہ آپﷺ کے بعد۔
امام ترمذی کہتے ہیں:
۱۔ یہ حدیث حسن غریب ہے، اس کی سند متصل نہیں ہے۔
۲۔ (نسائی کے شیخ) ابوجعفر کہتے ہیں: میں نے نبی اکرم ﷺ کے حلیہ ٔ مبارک کی تفسیر میں اصمعی کو کہتے ہوئے سنا کہ (الْمُمَّغِطُ) کے معنی لمبائی میں جانے والے کے ہیں، میں نے ایک اعرابی کو سنا وہ کہہ رہا تھا (تَمَغَّطَ فِي نُشَّابَةٍ) یعنی اس نے اپنا تیر بہت زیادہ کھینچا اور (الْمُتَرَدِّدُ) ایسا شخص ہے جس کا بدن ٹھنگنے پن کی وجہ سے بعض بعض میں گھسا ہوا ہو اور (الْقَطَطُ)  سخت گھونگھریا لے بال کو کہتے ہیں، اور (وَالرَّجِلُ) اس آدمی کو کہتے ہیں جس کے بالوں میں تھوڑی خمیدگی ہو اور (الْمُطَهَّمُ) ایسے جسم والے کو کہتے ہیں جو موٹا اور زیادہ گوشت والا ہو اور (الْمُكَلْثَمُ) جس کا چہرہ گول ہو اور (الْمُشْرَبُ) وہ شخص ہے جس کی پیشانی میں سرخی ہو اور (الْأَدْعَجُ) وہ شخص ہے جس کے آنکھوں کی سیاہی خوب کالی ہو اور (الْأَهْدَبُ) وہ ہے جس کی پلکیں لمبی ہوں اور (الْكَتَدُ) دونوں شانوں کے ملنے کی جگہ کو کہتے ہیں اور (الْمَسْرُبَةُ) وہ باریک بال ہیں جو ایک خط کی طرح سینہ سے ناف تک چلے گئے ہوں اور (وَالشَّثْنُ) وہ شخص ہے جس کے ہتھیلیوں اور پیروں کی انگلیاں موٹی ہوں، اور (التَّقَلُّعُ) سے مراد پیر جماجما کر طاقت سے چلنا ہے اور (الصَّبَبُ) اترنے کے معنی میں ہے، عرب کہتے ہیں (انْحَدَرْنَا فِي صَبُوبٍ وَصَبَبٍ) یعنی ہم بلندی سے اترے (جَلِيلُ الْمُشَاشِ سے مراد شانوں کے سرے ہیں، یعنی آپﷺ بلند شانہ والے تھے، اور (الْعِشْرَةُ) سے مراد رہن سہن ہے اور  (عشیر) کے معنیٰ رہن سہن والے کے ہیں اور (الْبَدِيهَةُ) کے معنی یکایک اور یکبار گی کے ہیں، عرب کہتے ہیں بَدَهْتُهُ بِأَمْرٍ) میں ایک معاملہ کو لے کر اس کے پاس اچانک آیا۔