لغت میں (أدب ) سےمراد اخلاق ، اچھا طریقہ ، شائستگی ، سلیقہ اور تہذیب۔اصطلاح میں ادب کی تعریف ان الفاظ میں کی گئی ہے: [الأدب : استعمال مايحمد قولا وفعلا] “قابل ستائش قول و عمل اختیار کرنا ادب ہے۔ ” حافظ ابن قیم  فرماتے ہیں:[الأدب هو الدين كله] “دین سراپا ادب ہے۔”اسلامی تعلیمات پر سر سر ی نظر ڈالنے سے یہ حقیقت پوری طرح عیاں ہو جاتی ہے کہ اسلام کا نظام ادب نہایت وسیع اور مؤثر ہے۔ اس میں زندگی کے ہر معاملے اور ہر جہت سے متعلق آداب موجود ہیں ۔ اللہ تعالیٰ کے آداب ، رسول اللہ ﷺاور دیگر انبیاء و رسل کے آداب ، والدین ، ہمسائے، روجین اور اولاد کے آداب معاشرت، غیر مسلموں کے ساتھ معاملات کے آداب ، غرباء، مساکین اور فقراء کے آداب ، خوشی اور غمیکے آداب ، صحت و مرض کے آداب ، سفر و حضر کے آداب ، چھوٹے اور برے کے آداب ، غرض دینی اور دنیوی  ہر طرح کے آداب اسلام میں موجود ہیں۔ اسلام کا نظام ادب ایسے سنہری اصولوں اور قواعد پراستوار ہے کہ دوسرا کوئی مذہب یا تہذیب اس کی مثال پیش کرنے سے قاصر ۔ ادب کی اسی ہمہ جہتی اہمیت کے پیش نظر امام عبداللہ بن مبارک  فرماتے ہیں۔: [نحن إلى قليل من الأدب أحوج منا إلى كثير من العلم]ہمیں بہت سے علم کی بجائے تھوڑے سے ادب کی زیادہ ضرورت ہے۔”٭ادب کی اقسام:علمائے اسلام نے اسلامی آداب کو تین حصوں میں تقسیم کیا ہے ۔۱۔اللہ تعالیٰ کے ساتھ آداب ۲۔ رسول اللہ ﷺ کے ساتھ آداب ۳۔باقی مخلوقات کے ساتھ آداب۔٭اللہ تعالی کے ساتھ آداب :اللہ کے بارے مین درج ذیل اشیاء کا خیال رکھنا از حد ضروری ہے۔٭اللہ تعالیٰ کی وحدانیت کا اقرار اور اس کے مطابق عمل کرنا، کوئی ایسا عمل کرنے سے بچنا جو توحید الٰہی کا مخالف ہو۔٭دل  کو صرف محبت الٰہی کی طرف متوجہ رکھنا۔٭اس کے سوا کسی کو مشکلات و محن میں نا پکارنا۔انبیائے کرام        اللہ تعالیٰ کے ادب میں نہایت اعلیٰ مقام پر فائز ہیں، لہذا ابوالا نبیاء حضرت آدم         اسی ادب و احترام کا  لحاظ رکھتے ہوئے اپنے رب کو یوں پکارتے ہیں۔ ﴿رَ‌بَّنا ظَلَمنا أَنفُسَنا وَإِن لَم تَغفِر‌ لَنا وَتَر‌حَمنا لَنَكونَنَّ مِنَ الخاسِر‌ينَ﴾ (الأعراف7: 23) “اے ہمارے رب ! ہم نے اپنی جانوں پر ظلم کیا ہے، اور اگر تو نے ہمارے بخشش نہ کی اور ہم پر رحم نہ کیا تو بے شک ہم خسارہ پانے والوں میں سے ہو جائیں گے۔ ”یہ نہیں کہا کہ الٰہی! یہ تیری تقدیر تھی جو ہم پر غالب آگئی بلکہ کمال ادب سے بخشش  اور رحمت کی دعا کی۔٭رسول اللہ ﷺ کے ساتھ آداب : رسول اللہ ﷺ اللہ تعالیٰ کے آخری نبی ، بہت پیارے اور محبوب پیغمبر ہیں، لہذا آپ کے ساتھ ادب و احترام کا معاملہ یمان کی نعمت کی دلیل ہے جبکہ معمولی بے ادبی بھی ایمان کی دولت سے محرومی کا باعث بن سکتی ہے۔ ارشاد باری تعالیٰ ہے۔: ﴿يا أَيُّهَا الَّذينَ آمَنوا لا تَر‌فَعوا أَصواتَكُم فَوقَ صَوتِ النَّبِيِّ وَلا تَجهَر‌وا لَهُ بِالقَولِ كَجَهرِ‌ بَعضِكُم لِبَعضٍ أَن تَحبَطَ أَعمالُكُم وَأَنتُم لا تَشعُر‌ونَ ﴾ (الحجرات۴۹:۲)“اے ایمان والو! اپنی آوازیں نبی ﷺ کی آواز سے بلند نہ کرو اور نہ آپ سے اونچی آواز میں بات کرو جیسے تم آپس میں ایک دوسرے سےاونچی آواز میں (بات ) کرتے ہو، کہیں تمہارے عمل برباد نہ ہو جائیں اور تمہیں خبر بھی نہ ہو۔”لہذا رسول اکرم ﷺ کے ادب و احترام اور تعظیم و تکریم کے لیے درج ذیل آداب کو اختیار کرنا نہایت ضروری ہے۔:٭آپ کی اطاعت و فرمان برداری مین صدق دل سے آپ کے فرامین کو قبول کیا جائے۔٭آپ کے کسی حکم کی نا فرمانی کی جائے نہ اس کے خلاف قول و عمل اختیار کیا جائے۔٭آپ کے فرامین کے ساتھ لوگوں کی آراء کو پیش نہ کیا جائے بلکہ آپ کے فرمان کے بعد تمام قبل و قال کو ترک کر دیا جائے۔٭موجودہ دور میں آپ کی عزت و آبرو کی حفاظت کے لیے تن من دھن قربان کر دیا جائے۔٭مخلوق کے ساتھ آداب:اسلام نےمختلف مواقع اور مختلف شخصیات کے لحاظ سے مختلف آداب سکھائے ہیں، مثلاَ َ: والدین کے ادب و احترام کے تقاضے اور ہیں جبکہ بادشاہ اور حکمران کے آداب اور ہیں۔رشتہ داروں کے جو آداب ہیں وہ اجنبی مسلمان کے نہیں۔لیکن اسلام نے ہر حال اور ہر شخص لے لحاظ سے سنہری آداب دیے ہیں جنہیں اختیار کرنا دنیا میں عزت و وقار اور آخرت میں سر خروئی کی ضمانت ہے۔