جامع ترمذی: كتاب: قرآن کریم کی تفسیر کے بیان میں (باب: سورہ توبہ سے بعض آیات کی تفسیر​)

ترجمۃ الباب:

3098.

عبداللہ بن عمر رضی الله عنہ کہتے ہیں کہ عبداللہ بن عبداللہ بن اُبی کے باپ کا جب انتقال ہوا تو وہ رسول اللہ صلی الله علیہ وسلم کے پاس آئے، اور کہا کہ آپﷺ اپنی قمیص ہمیں عنایت فر دیں، میں انہیں (عبداللہ بن ابی) اس میں کفن دوں گا۔ اور ان کی نماز جنازہ پڑھ  دیجئے اور ان کے لیے استغفار فرما دیجئے۔ تو آپﷺ نے عبداللہ کو اپنی قمیص دے دی۔ اور فرمایا: ’’جب تم (غسل وغیرہ سے)  فارغ ہو جاؤ تو مجھے خبر دو۔ پھر جب آپﷺ نے نماز  پڑھنے کا ارادہ  کیا تو عمر رضی الله عنہ نے آپﷺ کو کھینچ  لیا، اور کہا: کیا اللہ نے آپ کو منافقین کی نماز پڑھنے سے منع نہیں فرمایا؟ آپﷺ نے فرمایا: ’’ مجھے دو چیزوں ﴿اسْتَغْفِرْ لَهُمْ أَوْ لاَ تَسْتَغْفِرْ لَهُمْ﴾ (ان کے لیے استغفار کرو یا نہ کرو) میں سے کسی ایک کے انتخاب کا اختیار دیا گیا۔  چنانچہ آپﷺ نے اس کی نماز  پڑھی۔ جس پر اللہ نے آیت ﴿وَلاَ تُصَلِّ عَلَى أَحَدٍ مِنْهُمْ مَاتَ أَبَدًا وَلا تَقُمْ عَلَى قَبْرِهِ﴾  نازل فرمائی۔ تو آپﷺ نے ان (منافقوں) پر نماز جنازہ پڑھنی چھوڑ دی۔
امام ترمذی کہتے ہیں: یہ حدیث حسن صحیح ہے۔