٭لغوی معنی:[شفعه]شفع سے ماخوذ ہے جس کے معنی :جوڑا ،اضافہ،زیادتی اور تقویت دینے کے ہیں ۔اسی طرح اس میں الضَّم،یعنی ایک چیز کو دوسری کے ساتھ ملانے کا مفہوم بھی پایا جاتا ہے ۔٭اصطلاحی تعریف:[شفعه] اصطلاحی تعریف یوں کی گئی ہے :[استحقاق شريك أخذ مبيع شريكه بثمنه]’’ایک شریک کی فروخت کردہ چیز کو اس کے طے شدہ قیمت پر لینے کا حق شفعہ کہلاتا ہے ۔‘‘٭شفعہ کی مشروعیت:شفعہ حدیث رسول اور اجماع امت سے ثابت ہے حضرت جابر﷜سے مروی ہے [قَضَى النَّبِيُّ ﷺ بِالشُّفْعَةِ فِي كُلِّ مَالٍ لَمْ يُقْسَمْ، فَإِذَا وَقَعَتِ الحُدُودُ وَصُرِّفَتِ الطُّرُقُ فَلاَ شُفْعَةَ](صحيح البخارى ،الشفعة،باب الشفعة فيما لم يقسم فإذا وقعت الحدود فلا شفعة،حديث:2225)’’نبی ﷺنے غیر منقسم جائیداد میں شفعے کا فیصلہ دیا، لیکن جب حد بند ی ہو جائے اور راستے جدا جدا ہو جائیں تو پھر شفعے کا حق باقی نہیں رہتا۔‘‘علمائے کرام کا شفعے کی مشروعیت پر اتفاق ہے ۔٭مشروعیتِ شفعہ کی حکمت : دین اسلام عدل و انصاف پر مبنی ایک الہامی مذہب ہے جس میں تمام قوانین و احکام انسانوں کی بھلائی اور ا ن کی فلاح کے لیے ہیں تمام قوانین کی بنیاد حکمت و دانائی پر ہے  ۔ہر شخص کے حقوق و فرائض  متعین کر دیے گئے ہیں تا کہ لوگ آپس میں محبت و مودت اور اتفاق و اتحاد سے رہیں کوئی شخص اپنے حق میں حد سے تجاوز نہ کرے‘ نہ فرائض میں کوتاہی برتے اس طرح اسلام نے انسانی باہمی رابط کو مضبوط رکھنے کے لیے بے شمار تعلیمات سے نوازا ہے انھی تعلیمات میں سے ایک اہم چیز شفعہ ہے اگر دو شریکوں میں سے ایک اپنا حصہ فروخت کرنا چاہے  تو اسے حکم دیا گیا ہے کہ وہ اسے فروخت کرنے سے قبل اپنے ساتھی کو خریدنے کی دعوت دے تا کہ کسی تیسرے شخص کے خریدنے سے اسے نقصان نہ پہنچے اور ان کے درمیان عداوت و دشمنی کی فضا پیدا نہ ہو‘نیز دونوں شریکوں کے درمیان الفت و محبت کے جذبات برقرار رہیں ‘لہذا اگر شریک وہ جائیداد خرید لیتا ہے تو ٹھیک ہے ورنہ اسے تیسرے شخص کو بیچنا ہوگا درست ہوگا اس طرح اسلام نے [لاضرر ولا ضرار]كا عملی نمونہ پیش کیا ہے ۔